കാലുകൾക്ക് വേണം കരുതൽ

ലക്ഷണങ്ങളില്ല എന്നതാണ് ഡയബറ്റിക് ഫുട്ടിനെ ഏറ്റവും ആശങ്കാജനകമാക്കുന്നത്. പ്രമേഹരോഗമുള്ളവർ കാലുകളുടെ സംരക്ഷണത്തിനു പ്രാധാന്യം നൽകണം

- ഡോ. സതീഷ് ഭട്ട് എസ് ഡയബറ്റോളസിജ്റ്റ് & ഡയബറ്റിക് ഫുട് സർജൻ ഡയബറ്റിക് കെയർ ഇന്ത്യ പനമ്പിള്ളിനഗർ, കൊച്ചി

ലക്ഷണങ്ങൾ ഇല്ല എന്നതാണ് "ഡയബറ്റിക് ഫുട് എന്ന രോഗാവസ്ഥയെ ഏറ്റവും ആശങ്കാജനകമാ ക്കുന്നത്. ഗുരുതരമായ പ്രമേഹ അനുബന്ധ രോഗമാണ് ഡയബറ്റിക് ഫുട് യഥാസമയത്ത് ചികിൽസ ലഭിച്ചില്ലെങ്കിൽ സർജറിയിലൂടെ രോഗബാധിതമായ ഭാഗം നീക്കം ചെയ്യേണ്ട സ്ഥിതി വരാം. അതുകൊണ്ട് തന്നെ ഏറെ കരുതൽ ഇക്കാര്യത്തിൽ പുലർത്തണം.

'ഡയബറ്റിക് ഫുട് എന്നാൽ

പ്രമേഹ രോഗികളിൽ രക്തത്തിൽ പഞ്ചസാരയുടെ അളവ് ഉയർന്ന നിലയിൽ തുടരുന്നതിനാൽ കാലുകളിൽ രക്തയോട്ടം കുറയുകയും നാഡീ പ്രവർത്തനം ദുർബലമാകുകയും ചെയ്യും. ഇതു സ്പർശന ശേഷി കുറയ്ക്കുന്നതിനാൽ കാൽ തട്ടുകയോ മുട്ടുകയോ ചെയ്താൽ അറിയാതെ വരാം. ചെരിപ്പ് ഊരിപ്പോകുന്നതു പോലും ചിലപ്പോൾ അറിഞ്ഞെന്നു വരില്ല.

കാലിലേൽക്കുന്ന പരുക്കുകളിൽ വളരെപ്പെട്ടെന്ന് അണുബാധ ഉണ്ടാകുകയും വ്രണങ്ങളാകുകയും ചെയ്യാം. ഈ അവസ്ഥയെയാണ് "ഡയബറ്റിക് ഫുട്' എന്നു വിളിക്കുന്നത്. തുടക്കത്തിൽ ലക്ഷണങ്ങൾ ഇല്ല എന്നതും ലക്ഷണങ്ങൾ തിരിച്ചറിയപ്പെടുന്നില്ല എന്നതും ഡയബറ്റിക് ഫുട് എന്ന രോഗാവസ്ഥ ഗുരുതരമാകാൻ വഴിയൊരുക്കാം. പ്രമേഹമുണ്ട് എന്നു തിരിച്ചറിയുന്ന ഘട്ടത്തിൽ തന്നെ പാദത്തിന്റെ ആരോഗ്യം വിലയിരുത്തേണ്ടതുണ്ട്. ഡോക്ടറുടെ ഭാഗത്തു നിന്നുണ്ടാകേണ്ട പ്രഥമ വിശകലനങ്ങളിലൊന്നാണത്. അതിനോടൊപ്പം സ്വയം കാലുകൾ വിശകലനം ചെയ്യുന്ന ശീലമുണ്ടാക്കുകയും വേണം. ചുവപ്പ്, വീക്കം, മുറിവ്, കുരു, നിറംമാറ്റം മുതലായവ ഉണ്ടോ എന്നു പരിശോധിച്ച് അറിയണം. കണ്ണാടി ഉപയോഗിച്ച് കാലിന്റെ എല്ലാ ഭാഗങ്ങളും പരിശോധിക്കുയോ കൂടെയുള്ളവരുടെ സഹായത്തോടെ വിശദമായി പരിശോധിക്കുകയോ ചെയ്യുക.