ഓൺലൈൻ ചെടികളെ വാടാൻ വിടല്ലേ

ഓൺലൈൻ ആയി വാങ്ങുന്ന ചെടി കയ്യിലെത്തുമ്പോൾ ശ്രദ്ധിക്കേണ്ട കാര്യങ്ങളും ഉടനടി നൽകേണ്ട പരിപാലനവും അറിയാം

- ജേക്കബ് വർഗീസ് കുന്തറ റിട്ട. പ്രഫസർ, ബോട്ടണി വിഭാഗം, ഭാരത് മാത കോളജ് എറണാകുളം

നഴ്സറി തോറും കയറിയിറങ്ങേണ്ട, മോഹിപ്പിച്ച ചെടി വീട്ടിലെത്തും. ഓൺലൈനിൽ ചെടി വാങ്ങുന്നതു ട്രെൻഡാകാൻ വേറെന്തു കാരണം വേണം. ഓൺ ലൈനിൽ വാങ്ങുന്ന ചെടി കുറിയർ വഴിയെത്തുമ്പോൾ ശ്രദ്ധിക്കേണ്ട കാര്യങ്ങളറിയാം.

വൈകരുത് പരിചരണം

അയയ്ക്കുന്ന പെട്ടിയുടെ ഭാരം കുറയ്ക്കാൻ ചെടികൾ ചട്ടിയിൽ നിന്നു പുറത്തെടുത്ത രീതിയിലോ വേരുകൾ ചകിരിച്ചോറിൽ പൊതിഞ്ഞോ പായ്ക്ക് ചെയ്യാറുണ്ട്. ഓർക്കിഡ്, അഡീനിയം, കള്ളിച്ചെടികൾ തുടങ്ങിയവ ഇത്തരത്തിൽ അയച്ചേക്കാം. ചട്ടിയോടെ ചെടി അയയ്ക്കുന്നവരുമുണ്ട്. ചെടിയും ചട്ടിയുമെല്ലാം പത്രക്കടലാസ്, ബ്രൗൺ പേപ്പർ, ടിഷ്യു പേപ്പർ തുടങ്ങിയവ കൊണ്ടു പൊതിഞ്ഞിട്ടുണ്ടാകും.

കുറിയർ കിട്ടിയാൽ അതിന്റെ മുകൾഭാഗം ഏതാണന്നു പരിശോധിച്ച് അവിടം തുറക്കുക. ചെടികൾ പൊതിഞ്ഞ കടലാസ് ഉൾപ്പെടെ പുറത്തെടുക്കണം. തുടർന്നു ചെടിയെ പൊതിഞ്ഞ ആവരണം, ഇലയ്ക്കും വേരിനും കേടു വരാതെ, ശ്രദ്ധയോടെ നീക്കുക.