എന്റെ മുറിയിലെ പ്രിയപ്പെട്ടവർ

പ്രചോദനം നൽകുന്ന ചിലർ വീട്ടിൽ തന്നെയുണ്ട് എന്ന് സിനിമാ സീരിയൽ താരം മീര വാസുദേവ്

- രൂപാ ദയാബ്ജി

ഇരുപത്തിമൂന്നു വർഷമായി അഭിനയ രംഗത്തുണ്ടെങ്കിലും മീര വാസുദേവിനെ ഇപ്പോഴും നമ്മൾ ഓർക്കുന്നത് തന്മാത്രയിലെ ലേഖയായാണ്. കൗമാരക്കാരനായ മകന്റെ അമ്മയായി, സ്നേഹനിധിയായ ഭാര്യയായി അഭിനയിച്ചു തകർത്ത മീര ഇപ്പോൾ തിരുവനന്തപുരത്തെ വീട്ടിൽ ഓട്ടപ്പാച്ചിലിലാണ്. എട്ടു വയസ്സുകാരനായ മകൻ അരിഹയെ സ്കൂളിൽ വിടണം.

തിരക്കുകളെല്ലാം ഒതുക്കി സംസാരിക്കാനിരുന്നപ്പോൾ മീര ഓർത്തത് ആ പഴയ കാലമാണ്. “ഇപ്പോഴും ബ്ലെസി സാറിന്റെ തന്മാത്ര'യാണ് എന്റെ മേൽവിലാസം. കുറച്ചു സിനിമകളിൽ അഭിനയിച്ച് പെട്ടെന്നു മറഞ്ഞപ്പോഴും പിന്നീടു തിരിച്ചു വന്നപ്പോഴും മലയാളത്തിന്റെ സ്നേഹം കിട്ടി. രണ്ടാം വരവിലാണ് വ്യത്യസ്തമായ വേഷങ്ങൾ ലഭിച്ചത്.

"തന്മാത്രയിലെ ലേഖയ്ക്ക് ഇത്ര ചെറിയ കുട്ടിയോ ?

അന്നെനിക്ക് 22 വയസ്സാണ്. എന്റെ മകനായി അഭിനയിച്ച കുട്ടിക്ക് എന്നേക്കാൾ മൂന്നോ നാലോ വയസ്സ് ഇളപ്പമേയുള്ളൂ. അവനിപ്പോൾ നായകനായി അഭിനയിച്ചില്ലേ. കുറച്ചു വർഷത്തിനു  ശേഷം 'ചക്കരമാവിൻ കൊമ്പത്തിലൂടെയുള്ള രണ്ടാം വരവിലും ഞാൻ കൗമാര മക്കളുടെ അമ്മയായിരുന്നു.

നല്ല വേഷങ്ങൾ കിട്ടുമ്പോൾ പ്രായം എത്രയെന്നു ചിന്തിച്ചിട്ടേയില്ല. "തന്മാത്രയിലെ റോൾ പല നടിമാരും വേണ്ടന്നു വച്ചതാണ് എന്നു ബ്ലെസി സാർ പറഞ്ഞതോർക്കുന്നു. ലേഖയാകാൻ വേണ്ടി വണ്ണം കൂട്ടി, ഡൾ മേക്കപ് ഇട്ടു, സാരികളും വില കുറഞ്ഞവ. നെടുമുടി വേണു ചേട്ടനാണ് അഭിനയത്തിന്റെ ടിപ്സ് പറഞ്ഞുതന്നത്. മലയാളം ഒട്ടും അറിയാത്ത എന്നെ ഡയലോഗ് പഠിപ്പിച്ചത് ചീഫ് അസോഷ്യേറ്റ് ഡയറക്ടറായ തോമസ് ചേട്ടനാണ്. വാക്കിന്റെ ടോണും മൂളലും വരെ അതേപടി പ്രോംപ്റ്റ് ചെയ്തുതന്നു.

ലേഖയെ പോലെ കുടുംബവിളക്കിലെ സുമിത്രയെയും മലയാളി ഇരുകയ്യും നീട്ടി സ്വീകരിച്ചു

ടിവിയിലൂടെയാണ് എന്റെ കരിയറിന്റെ തുടക്കം. പരസ്യങ്ങളായിരുന്നു ആദ്യം. പിന്നെ, ഹിന്ദിയിൽ രണ്ടു സീരിയലുകൾ, അതു രണ്ടും സൂപ്പർഹിറ്റ് ആയിരുന്നു. അപ്പോൾ സിനിമയിൽ നിന്നു വിളി വന്നു, "റൂൾസ് പ്യാർ കാ സൂപ്പർ ഹിറ്റ് ഫോർമുല.