அதிசயங்கள் நிறைந்த பூரி ஜெகநாதர் ஆலயம்!!

எம்பெருமான் ஸ்ரீ கிருஷ்ணரே பரம் பொருள் என்று வேதங்கள் கூறுகின்றன.

- - ஜி.ஏ. பிரபா

மகாவிஷ்ணு பல அவதாரங்கள் எடுத்துத் தன் பக்தர்களைக் காப்பாற்றுகிறார். அதில் அனைவராலும் கொண்டாடப்படுவது கிருஷ்ண அவதாரம். வேதத்தாலும் அளவிட முடியாத குணங்கள் நிரம்பியவன் பெருமான். தங்கள் பக்தியால் அவனின் அருளை உணர்ந்து, உலகின் பல இடங்களில் அவனைக் கொண்டாடி வருகிறார்கள்.

அவனின் அருள் எல்லா இடங்களிலும் மகா வீர்யத்துடன் பரவி இருக்கிறது என்றாலும் சில இடங்களில் எல்லையற்ற அதிசயங்கள் நிறைந்தும் இருக்கிறது. அவற்றுள் ஒன்றுதான் பூரி ஜெகநாதர் ஆலயம். கலியுகத்தின் கண்கண்ட தெய்வமாக ஜெகநாதர் கருதப்படுகிறார். பத்ரிநாத், ராமேஸ்வரம், பண்டரிபுரம், இவற்றுடன் பூரியும் பக்தர்களால் புனிதமாகக் கருதப்படுகிறது. ஒடிசாவின் பூரி நகரில் அமைந்துள்ள இக்கோயில் இந்தியாவின் கிழக்குக்கடற்கரையில் அமைந்துள்ள முக்கியமான வைணவத் தலம்.

ஸ்ரீகிருஷ்ணரின் வடிவமே ஜெகநாதர். இங்கு அவர் தன் அண்ணன் பலராமன், சுபத்ரா ஆகியோருடனும் காட்சி தருகிறார். மகாலஷ்மியுடன் சண்டை ஏற்பட்ட பிறகு, அவரிடம் மன்னிப்பு கேட்க, விஷ்ணு பூமிக்கு ஜெகனாதராக வந்ததாகக் கூறப்படுகிறது. ஜாதி வேறுபாடுகளை இவர் களைந்து எறிந்தார். இவரின் ரத யாத்திரையின் போது பல ஜாதியினரும் வடம் பிடித்து இழுக்கிறார்கள்.

தூய இதயத்துடனும், பக்தியுடனும் இவரை வழிபட்டால், இறைவன் உடனே அவர்கள் விருப்பத்தை நிறைவேற்றுவார் என்கிறார்கள். அறிவியலுக்குப் புலப்படாத பல அதிசயங்கள் நிறைந்த கோவிலாக இக்கோயில் விளங்குகிறது.

கட்டிட அமைப்பு.: ஜெகநாதர் பிரபஞ்சக் கடவுளென்று வணங்கப்படுகிறார். இக்கோயில் கி.பி 12-ம் நூற்றாண்டில் கங்கை வம்சத்தை நிறுவிய அனந்த வர்மன் சோடகங்க தேவரால் கட்டப்பட்டது. இங்குள்ள மூலவர் சிலை வேம்பு என்ற தாது பிரம்மத்தால் செய்யப்பட்டது.பன்னிரண்டு ஆண்டுகளுக்கு ஒரு முறை அதே மரத்தினால் மீண்டும் ஒருமுறை மூலவர் சிலை மறு உருவாக்கம் செய்யப்பட்டு பிரதிஷ்டை செய்யப்படுகிறது. இங்கு மூலவராக ஸ்ரீகிருஷ்ணர் காட்சி அளிக்கிறார்.