പപ്പായ; അഴകിനും -ആരോഗ്യത്തിനും

ചർമ്മത്തിന്റെ ആരോഗ്യത്തിനുവേണ്ട ജീവകം എ പപ്പായയിൽ ധാരാളമായി അടങ്ങിയിരിക്കുന്നതിനാൽ പപ്പായ പഴമായോ ജ്യൂസായോ നിത്യവും കഴിക്കുന്നത് ചർമ്മത്തെ മൃദുത്വമുള്ളതും തിളക്കമുള്ളതുമാക്കി വയ്ക്കും

- എം.കെ

ലോകത്തിലെ ഏറ്റവും ശ്രേഷ്ഠഫലമായ പപ്പായയുടെ വിലയും ഗുണവും അറിയാത്തവർ ചിലപ്പോൾ മലയാളികൾ മാത്രമായിരിക്കും. നമ്മൾ വിലകൽപ്പിക്കാതെ പാഴാക്കിക്കളയുന്ന പപ്പായ പല രോഗങ്ങൾക്കുമുള്ള മരുന്നാണെന്ന് നാം തിരിച്ചറിയുന്നില്ല. പോഷകങ്ങളുടെ കലവറയാണ് പപ്പായ എന്നുതന്നെ പറയാം. ശരീരത്തിന് ആവശ്യമായ നാരുകൾ, ധാതുലവണങ്ങൾ, വിറ്റാമിൻ എ, സി, ഇ, കാത്സ്യം, പൊട്ടാസ്യം എന്നിവയെല്ലാം പപ്പായയിൽ അടങ്ങിയിരിക്കുന്നു. ദഹനശക്തി വർദ്ധിപ്പിക്കുന്ന തിനും കുടൽശുദ്ധിക്കും വിരകളെ നശിപ്പിക്കുന്ന തിനും പപ്പായയ്ക്ക് കഴിവുണ്ട്. സാധാരണയായി പഴുത്താൽ മധുരമുണ്ടാക്കുന്ന ഫലങ്ങൾ പ്രമേഹ രോഗികൾക്ക് കഴിക്കാൻ പാടില്ലാത്തതാണ്. എന്നാൽ പപ്പായ പഴുത്തതോ പച്ചയോ പ്രമേഹ രോഗികൾക്ക് കഴിക്കാം. പപ്പായ കഴിക്കുന്നതുവഴി ഇവരിൽ വിറ്റാമിൻ ഡിയുടെ കുറവ് നികത്തുന്നതോടൊപ്പം ദഹനശക്തി വർദ്ധിക്കുന്നതായും കണ്ടുവരുന്നു.