ജനിച്ചുവളർന്നത് മുംബയിലാണെങ്കിലും...

സൂര്യാകൃഷ്ണമൂർത്തിയുടെ കൊല്ലം ചാപ്റ്ററായി പ്രവർത്തിക്കുന്ന, ശുദ്ധകലയ്ക്ക് വേണ്ടിയുള്ള ഒരു സംഘടനയാണ് 'ലയതരംഗ്.' സമൂഹത്തിന്റെ വിവിധ മേഖലകളിൽ കഴിവ് തെളിയിച്ച 22 വനിതകൾ ചേർന്ന് 2017 ൽ തുടക്കം കുറിച്ച ഈ സംഘടന ലോകത്തെ എണ്ണം പറഞ്ഞ പല കലാകാരന്മാരേയും തങ്ങളുടെ വേദിയിൽ എത്തിച്ചിട്ടു ണ്ട്. ഇൻഡ്യക്കകത്തും പുറത്തും പ്രശസ്തയായ മോഹിനിയാട്ട കലാകാരി ഡോ. സുനന്ദനായരും അങ്ങനെയാണ്, കൊല്ലത്തെത്തിയത്. ആ അവസരത്തിൽ സുനന്ദനായർ 'മഹിളാരത്ന'ത്തോട് സംസാരിച്ചപ്പോൾ..

- പി. ജയചന്ദ്രൻ

പാലാഴി കടഞ്ഞപ്പോൾ കിട്ടിയ അമൃത് അസുരന്മാരിൽ നിന്നും കൈക്കലാക്കുവാൻ ഭഗവാൻ മഹാവിഷ്ണു മോഹിനിരൂപം പൂണ്ടു എന്നാണല്ലോ ഐതിഹ്യം. ആ ഇതിഹാസ സന്ദർഭത്തെ അനുസ്മരിക്കുവാനായി ക്ഷേത്ര നർത്തകിമാർ ആടിയ ലാസ്യനൃത്തരൂപമാണ് മോഹിനിയാട്ടം. സുന്ദരിയുടെ ആട്ടം എന്നർത്ഥം. പതിഞ്ഞ താളത്തിലുള്ള സംഗീതത്തിനൊത്ത്, കൺകോണുകളിലും ഉടലിലും നിറയുന്ന ലാസ്യം കാണികളുടെ ഹൃദയം കവരാൻ പോന്നതാണ്.

മലയാളത്തിലെ ഒരേയൊരു ശാസ്ത്രീയ നൃത്തകലയായും മോഹിനിയാട്ടത്തെ വിശേഷിപ്പിക്കുന്നുണ്ട്.

കേരളത്തിന്റെ ഈ തനതു നൃത്തശൈലി യുടെ പുനരുജ്ജീവനത്തിനും പ്രചാരണത്തിനുമായി ജീവിതം ഉഴിഞ്ഞുവച്ച് പ്രശസ്ത മോഹിനിയാട്ട നർത്തകിയാണ് ഡോ. കനകലു. ആ സമർപ്പണത്തെ പത്മഭൂഷൺ ബഹുമതി നൽകിയാണ് രാജ്യം ആദരിച്ചത്. ആ കനകേലുവിന്റെ ശിഷ്യയാണ്, ഗുരുവിനെപ്പോലെത്തന്നെ മോഹിനിയാട്ടത്തിന്റെ പ്രചാരണത്തിനായി നിരന്തരം പ്രവർത്തിക്കുന്ന ഡോ. സുനന്ദനായർ. മികച്ച മോഹിനിയാട്ട നർത്തകി എന്ന നിലയിലും നൃത്താദ്ധ്യാപിക എന്ന നിലയിലും പ്രശസ്തയായ ഡോ. സുനന്ദനായർ, മോഹിനിയാട്ടത്തിൽ ബിരുദവും ബിരുദാനന്തരബിരുദവും നേടിയ ആദ്യത്തെ ഇൻഡ്യാകാരി കൂടിയാണ്. മുംബൈയിൽ ജനിച്ചു വളർന്ന്, അവിടെ സ്ഥിരതാമസമാക്കിയിട്ടുള്ള ഈ പാലക്കാട്ടുകാരി മുംബൈ യൂണിവേഴ്സിറ്റിയിൽ നിന്നുമാണ് മോഹിനിയാട്ടത്തിൽ ബിരുദവും ബിരുദാനന്തരബിരുദവും പിന്നെ പി.എച്ച്.ഡിയും കരസ്ഥമാക്കിയത്.