ഗ്രീൻ റൂം

'നാടകാചാര്യൻ ഇബ്രാഹിം വെങ്ങര ‘മഹിളാരത്നത്തിന് നൽകിയ പ്രത്യേക അഭിമുഖം

- സായി രാജലക്ഷ്മി

ആറുപതിറ്റാണ്ടിലേറെയായി നാടകകലയു മായി പ്രവർത്തിക്കുന്ന വളരെ പ്രഗത്ഭനായ ഒരു നാടകപ്രതിഭയാണ് ഇബ്രാഹിം വെങ്ങര. ബാല്യം മുതൽ തന്നെ നാടകത്തോട് അടങ്ങാത്ത ഒരു അഭി നിവേശം ഉണ്ടായിരുന്ന അദ്ദേഹം പക്ഷേ വളരെ അപ്രതീക്ഷിതമായിട്ടാണ് ഒരു നാടകനടനായി 1961 ൽ നാടകരംഗത്തേക്ക് വന്നത്. നാടകനടൻ, നാടക കൃത്ത്, നാടകസംവിധായകൻ, നാടകസമിതി ഉടമ എന്നിങ്ങനെ നാടകത്തിന്റെ വിവിധ മേഖലകളിൽ പ്രവർത്തിച്ച അദ്ദേഹത്തിന്റെ നാടകങ്ങൾ കേരളത്തിലുടനീളമുള്ള വേദികളിൽ വലിയ പ്രകമ്പനങ്ങൾ സൃഷ്ടിച്ചിട്ടുള്ളവയാണ്.

സമൂഹത്തെ ശരിയായ ദിശയിലേക്ക് നയിക്കാൻ കഴിയുന്നവയായിരുന്നു അദ്ദേഹത്തിന്റെ നാടകങ്ങൾ. അടിയന്തിരാവസ്ഥക്കാലത്ത് അദ്ദേഹം എഴുതിയ “ഭൂതവനം' എന്ന നാടകം അവതരിപ്പിച്ചതിന് അന്നത്തെ സർക്കാർ വിചാരണ കൂടാതെ മൂന്നു മാസം അദ്ദേഹത്തെ കണ്ണൂർ ജയിലിലാക്കിയിരുന്നു.

സെയ്തുമാടത്ത്, അലിക്കുഞ്ഞി കുഞ്ഞാമിന ദമ്പതിമാരുടെ മകനായി 1941 ൽ കണ്ണൂർ ജില്ലയിലെ വെങ്ങരയിലാണ് ഇബ്രാഹിം വെങ്ങരയുടെ ജനനം. മൂന്നുവയസ്സുള്ളപ്പോൾ അച്ഛൻ മരിച്ചു. ഏഴ് വയസ്സ് മുതൽ തളിപ്പറമ്പിൽ അമ്മയുടെ തറവാട്ടിലായി രുന്നു താമസം. വെങ്ങര മാപ്പിള എൽ.പി സ്ക്കൂളിൽ നിന്നും പ്രാഥമിക വിദ്യാഭ്യാസം മാത്രം നേടിയ ഇബ്രാഹിം, പിൽക്കാലത്ത് തളിപ്പറമ്പ് വയോജന വായനശാലയിൽ നിന്നാണ് എഴുതാനും, വായിക്കാനും പഠിച്ചത്. പന്ത്രണ്ട് വയസ്സുള്ളപ്പോൾ ഒരു നാടകം കണ്ടതിന്റെ പേരിൽ തറവാട്ടിൽ നിന്നും അടിച്ചിറക്കപ്പെട്ട അദ്ദേഹം പിന്നീട് ഇന്ത്യയിലെ പല സ്ഥലങ്ങളിൽ സഞ്ചരിച്ച് സഞ്ചരിച്ച് വിവിധ ജോലികൾ ചെയ്തിരുന്നു. പതിനാല് വർഷങ്ങൾക്കുശേഷം വീട്ടിൽ തിരിച്ചെത്തുമ്പോൾ അദ്ദേഹം ഒരു നാടകനടനും, നാടകകൃത്തും നാടകസംവിധായകനുമായി മാറിയിരുന്നു.

 സാങ്കേതിക സങ്കീർണ്ണതകൾ നിറച്ചുകൊണ്ട് നാടകമെന്ന കലാരൂപം പ്രേക്ഷകരിൽ നിന്ന് അകന്നുപൊയ്ക്കൊണ്ടിരുന്ന ഒരു കാലഘട്ടത്തിലാണ് ഇബ്രാഹിം വെങ്ങര കരുത്തും, ഉൾക്കാമ്പും, ജീവിതവും നിറഞ്ഞ തന്റെ നാടകങ്ങളിലൂടെ ആസ്വാദകരെ പിടിച്ചുനിർത്തിയത്. ആദ്യനാടകരചനയായ “ആർത്തി, 1965 ൽ എഴുതി അവതരിപ്പിക്കുകയും “ആർത്തിയ്ക്ക് ആ വർഷത്തെ കേരള സംസ്ഥാന അവാർഡ് ലഭിക്കുകയും ചെയ്തു. രണ്ട് ദേശീയ അവാർഡുകൾ, നാല് സംസ്ഥാന അവാർഡുകൾ, രണ്ട് കേരള സാഹിത്യ അക്കാദമി അവാർഡുകൾ, സംഗീത നാടക അക്കാദമി അവാർഡുകൾ ഉൾപ്പെടെ നിരവധി അവാർഡുകളും, പുരസ്ക്കാര ങ്ങളും അദ്ദേഹത്തെ തേടിയെത്തി.