மறதியே உலக இயல்பு!

என் மகன் கணக்கு, சயின்ஸ் எல்லாம் ரொம்ப நல்லா படிக்கிறான்.

- 

இந்த மனப்பாடப் பாடல் மட்டும் படிக் கிறான், ஆனால் மறந்து போயிடறான் என்கிறார் சூர்யாவின் தாய்.

அவங்க தாத்தா கூடச் சேர்ந்து சேர்ந்து என் பொண்ணு வெண்ணிலா திருக்குறள் நல்லா படிக்கிறா. கணக்குன்னாத் தான் வேப்பங்காயா கசக்குது என்கிறார் இன்னொரு தந்தை.

ஒருவருக்குத் தமிழ் வரவில்லை என்பதும் இன்னொருவருக்கு கணிதம் தொடர்பான விஷயங்கள் சரியாக நினைவிருப்பதில்லை என்பதும் பொதுவான மன வருத்தங்கள். இதற்கு பரம்பரையாக நாம் நம் பெற்றோரிடமிருந்து மூதாதையர்களிடம் இருந்தும் பெற்றுக்கொள்ளும் மரபணுக்கள் முக்கிய காரணம் என்றாலும், ஒரு குழந்தை வளரும் முறை, அதன் மனதில் எது முக்கியம் என்று தோன்றுவது, கல்வி மேல் அது வைத்திருக்கும் கண்ணோட்டம் எல்லாமே மிக முக்கியம். அந்தக் குறிப்பிட்ட பாடம் மறக்காமல் நன்றாக நினைவில் இருப்பதற்கு நாம் அதற்கு மனதளவில் கொடுக்கும் முக்கியத்துவமும் காரணம்.

திருக்குறளை நன்றாக படிக்கும் வெண்ணிலாவின் தாத்தா, திருக்குறள் வழி வாழ்பவர். தினசரி நடக்கும் சம்பவங்களை திருக்குறளை மேற்கோள் காட்டிப் பேசுகிறார். திருக்குறள் தொடர்பான கதைகளைப் பேத்தி தூங்கும் போது சொல்கிறார். அதனால் அதே திருக்குறளைப் பள்ளியில் படிக்கும் பொழுது வெண்ணிலாவுக்கு அது நன்றாக நினைவில் இருக்கிறது.

அதே சமயம் சூர்யாவின் தந்தை ஒரு எலக்ட்ரானிக்ஸ் பிரியர். ரேடியோ, டிவி, வாகனம் என்று எது கிடைத்தாலும் பிரித்து வேலை பார்ப்பார்.

ஒவ்வொரு பொருளின் இயங்குமுறையையும் பிள்ளைகளுக்குச் சொல்லிக் கொடுத்து வளர்க்கிறார்.

தாய் கணித ஆசிரியை.

அதனால் சிறு வயது முதல் சூர்யாவுக்கு இவை இரண்டும் இயல்பாகவே வந்திருக்கலாம்.

கல்லூரிப் பருவத்தில் இவர்கள் இருவரையும் தனித்தனியே சந்தித்துக் கேட்டோம் என்றால், வெண்ணிலா அறிவியலில் ஓரளவு மதிப்பெண் எடுத்து தேறியிருக்கக்கூடும், சூர்யாவும் தமிழில் தேறியிருப்பான், ஆனால் அவர்கள் நன்றாகப் புரிந்து, விரும்பிப் படித்த பாடம்தான் இப்பொழுது வரை நினைவிருக்கும்.

உண்மையாகவே ஒரு பாடத்தை மறக்காமல் படிக்க வேண்டும் என்றால் நாம் செய்ய வேண்டிய முக்கியமான விஷயம், அந்தப் பாடத்தைப் புரிந்து படிக்க வேண்டும்.