முஸ்லிம் அறக்கட்டளைகள் மீதான வக்பு சபையின் வரலாற்று சிறப்புமிக்க உத்தரவு

முஸ்லிம் தொண்டு நிறுவனங்களில் பொறுப்புக்கூறல் மற்றும் சீர்திருத்தத்தின் புதிய சகாப்தத்தைக் குறிக்கும் வரலாற்றுச் சிறப்புமிக்க ஒரு நடவடிக்கையாக கடந்த ஏப்ரல் 30, 2025 அன்று ஒரு முக்கிய உத்தரவை இலங்கை வக்பு சபை பிறப்பித்துள்ளது.

- 

கல்எலியவில் அமைந்துள்ள 65 ஆண்டு பழைமையான முஸ்லிம் மகளிர் அரபுக் கல்லூரியின் ((MLAC) நிர்வாகம் தொடர்பில் ஏற்பட்டுள்ள சர்ச்சையை முடிவுக்குக் கொண்டுவருமுகமாக, கல்லூரியின் நிர்வாகத்துடன் சம்பந்தப்பட்ட அனைத்து தரப்பினரிடமிருந்தும் வாய்மொழி மற்றும் எழுத்துப்பூர்வ சமர்ப்பிப்புகள் மூலம் மேற்கொள்ளப்பட்ட விவாதங்களைத் தொடர்ந்து அக்கல்லூரி இனி வக்ப் சட்டத்தின் விதிகளின் கீழ் முறையாகப் பதிவு செய்யப்பட்டு நிர்வகிக்கப்பட வேண்டும் என வக்பு சபை உத்தரவிட்டுள்ளது.

வக்ப் சபை என்றால் என்ன?

இலங்கை வக்பு சபையானது பாராளுமன்றத்தால் இயற்றப்பட்ட (திருத்தங்களுக்கு அமைய) 1956 ஆம் ஆண்டு 51 ஆம் இலக்க வக்ப் சட்டத்தின் கீழ் நிறுவப்பட்ட ஒரு சட்டபூர்வ அமைப்பாகும் என்பதை பலரும் அறிவர். மேற்படி சட்டத்தின் பிரிவு 32 (1) இல் குறிப்பிடப்பட்டுள்ள நோக்கங்களுக்காக உருவாக்கப்படும் முஸ்லிம் மதத் தலங்கள் மற்றும் தொண்டு அறக்கட்டளைகளை (வக்ப்கள்) பதிவு செய்வதற்கும் மேற்பார்வையிடுவதற்கும் ஒரு சட்ட கட்டமைப்பை இது வழங்குகிறது.

வக்ப் நடைமுறை என்பது இஸ்லாமிய பொதுநல அமைப்புக்களில் இருக்க வேண்டிய ஒரு முக்கிய நியதியாகும், அல்லாஹ்வின் திருப்தியை மட்டுமே நாடி ஒரு முஸ்லிம் பொது நலனுக்காக பணம், நிலம், கட்டிடம் அல்லது வருமானம் போன்றவற்றை பிற்காலத்தில் எவராலும் மாற்ற முடியாத விதத்தில் அர்ப்பணிப்புச் செய்வதை வக்பு செய்தல் எனப்படும். இதன் முக்கிய அம்சங்களாவன:

நிரந்தர அர்ப்பணிப்பு: ஒரு சொத்து வக்ப் என்று அறிவிக்கப்பட்டதன் பின் அதனை விற்கவோ அல்லது அதன் வாரிசுகளுக்கு உரிமை மாற்றவோ முடியாது. அது வக்பு செய்யப்பட்டவுடன் அதன் தொண்டு நோக்கங்களுடன் நிரந்தரமாக பிணைக்கப்பட்டு விடும்.

முஸ்லிம் பொதுமக்களுக்கான நன்மை: வக்புகளின் முதன்மை குறிக்கோள் மஸ்ஜிதுகளை, முஸ்லிம் பாடசாலைகளை அமைப்பது, முஸ்லிம்கள் செறிந்து வாழும் பகுதிகளில் சாலைகள் அமைப்பது, தண்ணீர் வசதிகள் செய்துகொடுப்பது போன்றவை மூலம் முஸ்லிம் சமூகத்திற்கு சேவை செய்வதாகும். ஆனால் ஏனைய சமூத்தினருக்கும் வக்பு சொத்துக்கள் மூலம் உதவிகள் செய்ய அனுமதி உண்டு.