મહિલા પોલીસની ડ્રાઈવ રંગ લાવીઃ પહેલા જ દિવસે જાહેરમાં ન્યુસન્સ કરતા બેની ધરપકડ

મહિલાઓને જોઈને ચાલુ વાહને ગંદી કોમેન્ટ કરતો યુવક પણ ઝડપાયોઃ મહિલા પોલીસની ૩૦ દિવસની ડ્રાઈવ

- 

શિયાળામાં દિવસ ટૂંકો અને રાત લાંબી છે ત્યારે શહેરની મહિલાને સુરક્ષિત રાખવાની જવાબદારી મહિલા પોલીસે તેમના શીરે લઈ લીધી છે. મહિલા પોલીસ દ્વારા સ્પેશિયલ ડ્રાઈવનું આયોજન રાખવામાં આવ્યું છે જે મહિલાઓની સલામતી માટે છે. ગઈકાલે શરૂ થયેલી ડ્રાઈવમાં મહિલા પોલીસને ત્રણ સફળતા મળી છે. જેમાં બે યુવક મહિલાઓને જોઈને જાહે૨માં ન્યુસન્સ ઊભું કરી રહ્યા હતા જ્યારે એક વાહનચાલક ગંદી કોમેન્ટ કરી રહ્યો હતો.

મહિલાઓની સુરક્ષા વધુ મજબૂત બનાવવા અને મોડી રાતના શહેરની મહિલાઓને સુરક્ષિત હોવાની અનુભૂતિ કરાવવા અમદાવાદ ક્રાઇમ બ્રાંચની મહિલા સેલ દ્વારા શહેરના મહત્ત્વના વિસ્તારોમાં વિશેષ ૩૦ દિવસીય ડ્રાઇવ શરૂ કરવામાં આવી છે. મહિલાઓની અવરજવર વધુ હોય તેવા વિસ્તારમાં પોલીસ રાત્રી દરમિયાન સતત પેટ્રોલિંગ કરીને મહિલાઓની સલામતી માટે ખાસ પ્રયાસ કરવામાં આવશે.