பள்ளிகளில் கல்வி வளர்ச்சி நாள் கொண்டாட்டம்

திருவண்ணாமலை மாவட்டத்தில் உள்ள பள்ளிகளில் காமராஜர் பிறந்த நாள் கல்வி வளர்ச்சி நாளாக செவ்வாய்க்கிழமை கொண்டாடப்பட்டது.

- 

ஆரணி/செங்கம்/வந்தவாசி/செய்யாறு ஜூலை 15:

ஆரணி சுப்பிரமணியசாமி கோவில் தெருவில் உள்ள நகராட்சி நடுநிலைப் பள்ளியில் காமராஜர் பிறந்த நாளையொட்டி, மாணவர்களுக்கு பேச்சுப் போட்டி, திருக்குறள் ஒப்புவித்தல் போட்டிகள் நடைபெற்றன.

இதில் வெற்றி பெற்றவர்களுக்கு தலைமையாசிரியர் சித்ரா, மேலாண்மை குழுத் தலைவர் ரமிலா தினகரன், கல்வியாளர் கே.எல்.சங்கர் ஆகியோர் பரிசுகளை வழங்கினர்.

இதில் மேலாண்மைக் குழு உறுப்பினர்கள் மற்றும் பெற்றோர்கள் கலந்து கொண்டனர். அனைவருக்கும் இனிப்பு வழங்கப்பட்டது.

முள்ளிப்பட்டு: தமிழ்நாடு ஓய்வு பெற்ற பள்ளிக்கல்லூரி ஆசிரியர் நலச் சங்கம் சார்பில் மேற்கு ஆரணி ஒன்றியம், முள்ளிப்பட்டு ஊராட்சி ஒன்றிய தொடக்கப் பள்ளியில் திருவண்ணாமலை மாவட்டச் செயலர் கே.எஸ்.திருநாவுக்கரசு தலைமையில் காமராஜர் பிறந்த நாள் விழா நடைபெற்றது.

சிறப்பு அழைப்பாளராக மேற்கு ஆரணி வட்டாரக் கல்வி அலுவலர் ஆறுமுகம் கலந்து கொண்டு கல்வியின் அவசியத்தையும், காமராஜர் ஆற்றிய பணிகளையும் எடுத்துக் கூறினார்.

இதில் மாநில செயற்குழு உறுப்பினர் இளங்கோவன், மாவட்ட துணைத் தலைவர் இல.ஆறுமுகம் மற்றும் செயற்குழு உறுப்பினர்கள் பொன்.சுப்பிரமணியம், பா.சரஸ்வதி, தலைமை ஆசிரியர் (பொ) கிரி ஆகியோர் பங்கேற்றனர்.

விழாவில் மாணவர்கள் காமராஜரின் வாழ்க்கை வரலாற்றை எடுத்துக் கூறி பேசினர்.

இறுதியில் மாணவர்களுக்கு பரிசளித்து இனிப்பு வழங்கப்பட்டது.