மகளிர் உரிமைத் தொகை உயர்த்தப்படும்

மகளிர் உரிமைத் தொகை திட்டத்தின் தொகை உயர்த்தப்படும் என்று முதல்வர் மு.க.ஸ்டாலின் உறுதியளித்தார்.

- முதல்வர் மு.க. ஸ்டாலின்

சென்னை நேரு உள்விளையாட்டரங்கில் மகளிர் உரிமைத் தொகை திட்டத்தின் 2-ஆம் கட்ட விரிவாக்கத்தை வெள்ளிக்கிழமை தொடங்கி வைத்து முதல்வர் பேசியதாவது:

ஜாதி, மத, இன, மொழி, பாலினப் பாகுபாடு இல்லாமல், எல்லாருக்கும் எல்லாம் என்ற சமத்துவ சமுதாயமாக இயங்க வேண்டும் என்பதுதான் திமுக அரசின் லட்சியம். அதனால்தான், 2021 மே 7-ஆம் நாள், முதல்வராகப் பொறுப்பேற்றவுடன் ஏராளமான முன்னோடித் திட்டங்களைச் செயல்படுத்தத் தொடங்கினேன். இதில் கலைஞர் மகளிர் உரிமைத் தொகை திட்டம் வரலாற்றை திருத்தி எழுதும் திட்டமாக அமைந்திருக்கிறது.

வெற்றித் திட்டம்: இந்தத் திட்டத்தின் கீழ் வழங்கப்படும் 1,000 ரூபாய் - உதவித் தொகை அல்ல, உரிமைத் தொகை. ஒரு திட்டத்தை பொதுமக்கள் எந்த அளவுக்குச் சிறப்பாகப் பயன்படுத்திக் கொண்டு, தங்களின் வாழ்க்கைத் தரத்தை, சமூக நிலையை மேம்படுத்திக் கொள்கிறார்கள் என்பதில்தான் அந்தத் திட்டத்தின் உண்மையான வெற்றி இருக்கிறது.

தமிழகத்தில் மகளிர் மாதம் 1,000 ரூபாயை பெறுகிறார்கள்; விடியல் பயணத்தில் மாதந்தோறும் கிட்டத்தட்ட 1,000 ரூபாய் மீதமாகிறது. புதுமைப் பெண், தமிழ்ப் புதல்வன் திட்டங்களில் தங்களின் பிள்ளைகளுக்கு மாதம் 1,000 ரூபாய் கிடைப்பதால் ஒவ்வொரு குடும்பத்திலும் பணப்புழக்கமும், சேமிப்பும் அதிகரித்திருக்கிறது.

திராவிட மாடல் அரசின் முத்திரைத் திட்டங்களை முதலீடாக மாற்றி, தங்களின் பொருளாதார வலிமையை தமிழ்நாட்டுப் பெண்கள் உயர்த்திக் கொள்கிறார்கள். இதைத்தான் இந்தத் திட்டத்தின் வெற்றியாகப் பார்க்கிறேன்.