மதுரையில் சுந்தரராஜப் பெருமாள் தசாவதாரம்: விடிய விடிய பக்தர்கள் தரிசனம்

மதுரை அழகர் கோவில் கள்ளழகர் கோயில் சித்திரைத் திருவிழாவையொட்டி, ராமராயர் மண்டபத்தில் தசாவதார நிகழ்வு செவ்வாய்க்கிழமை இரவு முழுவதும் நடைபெற்றது. ஆயிரக்கணக்கான பக்தர்கள் விடிய விடிய சுவாமி தரிசனம் செய்தனர்.

- 

மதுரை, மே 14:

சித்திரைத் திருவிழாவின் முக்கிய நிகழ்வாக அழகர் பச்சைப் பட்டுடுத்தி தங்கக் குதிரை வாகனத்தில் கடந்த திங்கள்கிழமை அதிகாலை வைகையாற்றில் எழுந்தருளினார். இதில் லட்சக்கணக்கான பக்தர்கள் பங்கேற்று தரிசனம் செய்தனர். இதைத் தொடர்ந்து, தீர்த்தவாரி நடைபெற்றது. அப்போது, அழகர் வேடமிட்ட பக்தர்கள் சுவாமி மீது தண்ணீர் பீய்ச்சி நேர்த்திக்கடன் செலுத்தினர். இதையடுத்து, அன்று பகல் 12 மணிக்கு ராமராயர் மண்டபத்தில் அழகர் எழுந்தருளினார். பின்னர், பிற்பகல் 3 மணிக்கு அங்கிருந்து புறப்பாடாகி பல்வேறு மண்டகப்படிகளில் எழுந்தருளி பக்தர்களுக்கு அருள்பாலித்தார். இதைத்தொடர்ந்து, அன்றிரவு அழகர் வண்டியூர் வீரராகவப் பெருமாள் கோயிலைச் சென்றடைந்தார். அங்கு திருமஞ்சனமாகினார்.

இதையடுத்து, செவ்வாய்க்கிழமை காலை சிறப்பு பூஜைகளுக்குப் பிறகு, அழகர் சேஷ வாகனத்தில் சுந்தரராஜப் பெருமாள் திருக்கோலத்தில், வண்டியூர் வைகையாற்றின் மையத்தில் அமைந்துள்ள தேனூர் மண்டபத்தில் எழுந்தருளினார். அங்கு மண்டூக முனிவருக்கு சாப விமோசனம் அளிக்கும் நிகழ்வும், நாரைக்கு முக்தி அளிக்கும் நிகழ்வும் நடைபெற்றது. இதில் பல்லாயிரக்கணக்கான பக்தர்கள் பங்கேற்று தரிசனம் செய்தனர். இதைத் தொடர்ந்து, கருட வாகனத்தில் செவ்வாய்க்கிழமை இரவு ராமராயர் மண்டபத்தில் சுந்தரராஜப் பெருமாள் எழுந்தருளினார். அங்கு சிறப்பு திருமஞ்சன அலங்காரத்துக்குப் பிறகு, நள்ளிரவு 12 மணிக்கு தசாவதார நிகழ்வு தொடங்கியது.