சின்னர், ஜோகோவிச் வெற்றி

விம்பிள்டன் டென்னிஸ் போட்டியில் முன்னணி வீரர்களான இத்தாலியின் யானிக் சின்னர், செர்பியாவின் நோவக் ஜோகோவிச் ஆகியோர் ரவுண்ட் ஆஃப் 16-இல் வென்று காலிறுதிக்கு தகுதிபெற்றனர்.

- 

லண்டன், ஜூலை 8:

ஆடவர் ஒற்றையர் காலிறுதிக்கு முந்தைய சுற்றில், உலகின் நம்பர் 1 வீரரான சின்னர் - போட்டித்தரவரிசையில் 19-ஆம் இடத்திலிருந்த பல்கேரியாவின் கிரிகோர் டிமிட்ரோவை எதிர்கொண்டார். முதல் கேமின்போது நிலை தடுமாறி விழுந்ததில் சின்னருக்கு முழங்கையில் அடிபட்டது. இதனால் அவர் தனது முதல்தர ஆட்டத்தை வெளிப்படுத்த முடியாமல் சிரமப்பட்டார்.

எனவே, டிமிட்ரோவ் முதலிரு செட்களை 6-3, 7-5 என கைப்பற்றி முன்னிலை வகித்தார். ஆனால், 3-ஆவது செட்டில் இருவரும் 2-2 என சமநிலையில் இருந்த போது, டிமிட்ரோவுக்கு வலதுபக்க மார்புக் கூடு பகுதியில் வலி ஏற்பட்டது. அவரால் தொடர்ந்து விளையாட முடியாமல் போக, போட்டியிலிருந்து விலகுவதாக டிமிட்ரோவ் கண்ணீருடன் அறிவித்தார்.

இத்துடன் டிமிட்ரோவ், கிராண்ட்ஸ்லாம் போட்டிகளில் அவர் களம் கண்ட 5 முறையுமே காயம் காரணமாக விலகி ஏமாற்றத்தை சந்தித்துள்ளார். கடந்த ஆண்டு விம்பிள்டன், யுஎஸ் ஓபன், இந்த ஆண்டு ஆஸ்திரேலிய ஓபன், பிரெஞ்சு ஓபன் ஆகியவற்றிலும் அவர் காயம் காரணமாக விலகியது குறிப்பிடத்தக்கது.