பொதுக் குழு தீர்மானத்தை மீறியதால் செங்கோட்டையன் நீக்கம்

சேலம், நவ. 1: 'அதிமுக பொதுக்குழு தீர்மானத்துக்கு எதிராகச் செயல்பட்டதால் கட்சியிலிருந்து செங்கோட்டையன் நீக்கப்பட்டார்' என்று அதிமுக பொதுச் செயலர் எடப்பாடி கே. பழனிசாமி தெரிவித்தார்.

- 

சேலம் சூரமங்கலம் நெடுஞ்சாலை நகரில் உள்ள அதிமுக அலுவலகத்தில் அவர் செய்தியாளர்களிடம் சனிக்கிழமை கூறியதாவது: முன்னாள் அமைச்சர் செங்கோட்டையனின் நடவடிக்கைகளை கடந்த ஆறு மாதங்களாக கவனித்து வருகிறோம். அத்திக்கடவு-அவினாசி திட்டம் முடிவடைந்த நிலையில், அங்குள்ள விவசாயிகள், பல்வேறு கட்சியைச் சேர்ந்தவர்கள் சார்பில் கட்சி சார்பற்ற முறையில் பாராட்டு விழா நடைபெற்றது. அந்நிகழ்ச்சியில் எம்.ஜி.ஆர்., ஜெயலலிதா படங்கள் இடம்பெறவில்லை. அப்போது இந்தப் பிரச்னையை எழுப்பிய செங்கோட்டையன், அதிலிருந்தே தொடர்ந்து அதிமுகவுக்கு எதிரான நடவடிக்கைகளை மேற்கொண்டு வந்தார்.

அதேநேரத்தில் முன்னாள் முதல்வர் கருணாநிதி, முதல்வர் ஸ்டாலின் ஆகியோரின் புகைப்படங்கள் மட்டுமே இடம்பெற்றிருந்த இலவச சைக்கிள் வழங்கும் விழாவில் செங்கோட்டையன் கலந்துகொண்டார்.