உச்சநீதிமன்றத்தின் 11-ஆவது பெண் நீதிபதி பெலா எம். திரிவேதி ஓய்வு

உச்சநீதிமன்றத்தின் 11-ஆவது பெண் நீதிபதியாக கடந்த 2021-ஆம் ஆண்டு பதவியேற்ற பெலா எம். திரிவேதி வெள்ளிக்கிழமை ஓய்வு பெற்றார்.

- 

புது தில்லி, மே 16:

அவரை வழியனுப்பும் விதமாக உச்சநீதிமன்றத்தில் நடைபெற்ற சிறப்பு அமர்வுக்கு தலைமை நீதிபதி பி.ஆர். கவாய் தலைமை வகித்தார். நீதிபதி பெலா எம்.திரிவேதியுடன் அகஸ்டின் ஜார்ஜ் மாசியும் இந்த அமர்வில் இடம் பெற்றார்.

குஜராத் மாநிலத்தில் 1995-ஆம் ஆண்டு ஜூலை மாதம் விசாரணை நீதி மன்ற நீதிபதியாக அகமதாபாத்தில் தனது நீதித்துறை பயணத்தைத் தொடங்கிய பெலா எம்.திரிவேதி, படிப்படியாக உச்சநீதிமன்ற நீதிபதி என்ற நிலைக்கு உயர்ந்தார். உச்சநீதிமன்ற நீதிபதியாக பல முக்கியத்துவம் வாய்ந்த தீர்ப்புகளை அளித்துள்ளார்.

மத்திய அரசு கடந்த 2019-ஆம் ஆண்டு அறிமுகம் செய்த பொருளாதாரத்தில் பின்தங்கிய முற்பட்ட வகுப்பினருக்கான 10 சதவீத இடஒதுக்கீடு செல்லும் என கடந்த 2022-ஆம் ஆண்டு நவம்பரில் 3:2 என்ற பெரும்பான்மை விகிதத்தில் தீர்ப்பளித்த உச்சநீதிமன்ற 5 நீதிபதிகள் கொண்ட அரசியல் சாசன அமர்வில் இவர் அங்கம் வகித்தார்.