தமிழகம், மேற்கு வங்கத்தை கேரளம் பின்பற்ற வேண்டும்

முஸ்லிம் அமைப்புகள் வலியுறுத்தல்

- 

திருவனந்தபுரம், ஏப்.10: மத்திய அரசு கொண்டுவந்த வக்ஃப் திருத்தச் சட்டத்தின் கீழ் வக்ஃப் வாரியத்தை அமைக்க முதல் மாநிலமாக கேரளம் நடவடிக்கை எடுத்து வரும் சூழலில், 'இந்த விவகாரத்தில் தமிழகம் மற்றும் மேற்கு வங்க மாநிலங்களைப் பின்பற்றி இந்த திருத்தச் சட்டத்துக்கு கேரள அரசு எதிர்ப்பு தெரிவிக்க வேண்டும்' என்று அம் மாநில முஸ்லிம் அமைப்புகள் வலியுறுத்தியுள்ளன.

இக்கோரிக்கையை வலியுறுத்தி பல்வேறு இஸ்லாமிய அமைப்புகள் கேரள மாநில ஆளுநர் மாளிகையை நோக்கி வியாழக்கிழமை கண்டனப் பேரணியையும் நடத்தின.

'நாட்டிலிருந்து முஸ்லிம் களை முற்றிலுமாக ஒழிப்பதற்கான முயற்சியாக இந்த திருத்தச் சட்டத்தை மத்திய அரசு கொண்டு வந்துள்ளது.

இதன் மூலம், முஸ்லிம் குடும்பங்கள் தலைமுறை தலைமுறையாக ஏழைகளின் நலனுக்காக நன்கொடையாக அளித்து வரும் வக்ஃப் சொத்துகள் உள்பட அவர்களின் அனைத்து சொத்துகளையும் பறிமுதல் செய்ய மத்திய அரசு முயற்சிக்கிறது' என்று போராட்டத்தில் ஈடுபட்ட இஸ்லாமிய தலைவர்கள் கூறினார்.