ஆதிதிராவிட தொழில்முனைவோருக்கு ரூ.160 கோடி மானியம்

ஆதிதிராவிட தொழில்முனைவோர் 1,303 பேருக்கு ரூ.160 கோடி மானியமாக வழங்கப்பட்டுள்ளது என்று தமிழக அரசு தெரிவித்துள்ளது.

- 

இது குறித்து, மாநில அரசின் சார்பில் ஞாயிற்றுக்கிழமை வெளியிடப்பட்ட செய்திக் குறிப்பு:

ஒடுக்கப்பட்ட சமுதாயத்தின் முன்னேற்றத்துக்காக, அண்ணல் அம்பேத்கர் தொழில் முன்னோடிகள் திட்டம் தொடங்கப்பட்டுள்ளது. இந்தத் திட்டத்துக் கான தொழில் முதலீட்டில் 35 சதவீதத் தொகையை மானியமாகவும், 65 சதவீதத் தொகைக்குரிய வங்கிக் கடன் வட்டியில் 6 சதவீதத் தொகையை வட்டி மானியமாகவும் அரசு அளிக்கிறது.

இதுவரையில் 1,303 தொழில் முனைவோருக்கு ரூ.159.76 கோடி மானியமாக வழங்கப்பட்டுள்ளது.

ஆதிதிராவிட மக்கள் வாழும் குடியிருப்புகளை மேம்படுத்த அயோத்திதாச பண்டிதர் பெயரில் குடியிருப்புத் திட்டம் செயல்படுத்தப்பட்டு வருகிறது. நிகழ்நிதியாண்டில் ரூ.230 கோடி மதிப்பில் 1,966 பணிகள் நடைபெற்று வருகின்றன. பழங்குடியினர் வாழ்வாதாரத்தை உயர்த்தும் நோக்கில் தொல்குடி திட்டம் செயல்படுத்தப்பட்டுள்ளது. இந்தத் திட்டத்தின் கீழ், வீடற்ற பழங்குடியினருக்கு 750 வீடுகள் ரூ.40.33 கோடியில் கட்டப்படுகிறது.