நைஜீரிய உறவுக்கு முன்னுரிமை: பிரதமர் மோடி

அபுஜா, நவ.17: பாதுகாப்பு, எரிசக்தி, வர்த்தகம் உள்ளிட்ட பல்வேறு துறைகளில் நைஜீரியாவுடன் ஒத்துழைப்புக்கு இந்தியா முன்னுரிமை அளிப்பதாக பிரதமர் மோடி ஞாயிற்றுக்கிழமை தெரிவித்தார்.

- 

நைஜீரிய அதிபர் போலா அகமது தினுபுடனான பேச்சுவார்த்தையின்போது அவர் இவ்வாறு தெரிவித்தார்.

நைஜீரியா, பிரேஸில், கயானா ஆகிய மூன்று நாடுகளுக்கான 6 நாள்கள் அரசுமுறைப் பயணத்தின் முதல்கட்டமாக, நைஜீரியாவுக்கு பிரதமர் மோடி சனிக்கிழமை புறப்பட்டுச் சென்றார்.

கடந்த 17 ஆண்டுகளில், இந்திய பிரதமர் ஒருவர் நைஜீரியாவுக்கு சென்றது இதுவே முதல்முறையாகும்.

இதுகுறித்து, இந்திய வெளியுறவு அமைச்சகம் வெளியிட்ட எக்ஸ் வலைதளப் பதிவில், 'நைஜீரிய தலைநகர் அபுஜாவை ஞாயிற்றுக்கிழமை சென்றடைந்த பிரதமர் மோடியை அரசு நிர்வாகத் துறை அமைச்சர் நியிசம் இசன்வோ விக் வரவேற்றார். அப்போது 'அபுஜா நகரத்தின் திறவுகோலை' பிரதமர் மோடியிடம் அவர் வழங்கினார். இது பிரதமர் மோடி மீது நைஜீரிய மக்கள் வைத்திருக்கும் மரியாதை மற்றும் அன்பை வெளிப்படுத்தியதற்குச் சமமாகும்' எனக் குறிப்பிடப்பட்டுள்ளது.

அதேபோன்று பிரதமர் மோடியை வரவேற்பதாக எக்ஸ் வலைதளத்தில் அதிபர் போலா அகமது தினுபு பதிவிட்டார்.