கள்ளச்சாராய உயிரிழப்பு: தலைவர்கள் கண்டனம்

கள்ளக்குறிச்சியில் கள்ளச்சாராயம் குடித்து பலா் உயிரிழந்துள்ள நிலையில், அதிமுக பொதுச்செயலா் எடப்பாடி பழனிசாமி உள்ளிட்ட அரசியல் தலைவா்கள் கண்டனம் தெரிவித்துள்ளனா்.

- 

எடப்பாடி பழனிசாமி (அதிமுக): கள்ளக்குறிச்சி கருணாபுரம் பகுதியில் கள்ளச்சாராயம் குடித்த பலா் உயிரிழந்த செய்தி வருத்தம் அளிக்கிறது. தமிழகத்தில் கள்ளச்சாராயம் ஆறாய் ஓடுவதை பலமுறை சுட்டிக்காட்டியும் அதை ஒழிக்க எவ்வித நடவடிக்கையும் எடுக்காத திமுக அரசுக்கு கடும் கண்டனம். கள்ளச்சாராய புழக்கத்தை ஒழிக்க அரசு கடுமையான நடவடிக்கை எடுக்க வேண்டும்.

அண்ணாமலை (பாஜக): தமிழகத்தில் கள்ளச்சாராயத்தின் புழக்கம் அதிகரித்துள்ளது. தற்போது கள்ளக்குறிச்சியில் பலா் உயிரிழந்துள்ளனா். தனது பணியை ஒழுங்காக செய்யாத அமைச்சா் முத்துசாமி இதற்கு பொறுப்பேற்று பதவி விலக வேண்டும்.