PLANNER SPOIL DIÉ COUPLES SE TROUES

Paartjies hul geld en groot dag kwyt

- 

HIER: Die venue waar al die troues sou plaasvind.

TROUREËLINGS en die aanloop tot die groot dag is veronderstel om een van die beste ervaringe in 'n mens se lewe te wees. Dié ervaring het egter vir etlike bruide in 'n nagmerrie ontaard toe hulle wedding planner met al hulle geld soos mis voor die son verdwyn het.

'n Video van 'n gebroke bruid wat haar hart uitstort nadat haar trouebeplanner, Bonita Smith (ook bekend as Swarts), haar in kennis gestel het dat sy bankrot is en haar vrywillig oorgegee het vir sekwestrasie, het dié week talle Kapenaars se hartsnare geroer.

Dié video het egter 'n groot bohaai ontketen toe nóg bruide na vore getree en ook hulle stories gedeel het.

Al die bruide (tot dusver ag) was veronderstel om in Desember en Januarie te trou en het almal bedrae van tussen R45 000 en R60 000 aan Bonita betaal wat nou nie meer hulle troues insluitende die venue, dekor en kos kan behartig nie omdat haar bankrekeninge glo dolleeg is.

Dié bedrogspul laat baie paartjies nou in sak en as sit en wonder oor wat hulle plan van aksie is.

Amber Moses van Stellenbosch en haar verloofde het in Januarie vir Bonita ontmoet en in Februarie bespreek vir hulle troue, wat op 16 Desember sou plaasvind

"Alles was volgens ons in orde en toe kry ons Maandagoggend 09:58 'n boodskap wat lees sy is bankrot. Ek het haar probeer bel, maar die foon het reguit voicemail toe gegaan. Ook haar WhatsApp werk nie. Ons het toe na die venue, Ou Stal in Stellenbosch, gegaan waar die eienaar ons ook in kennis gestel het dat Bonita bankrot is."

Die paartjie het altesaam R57 000 aan Bonita betaal.