'GOD WAS SAAM IN DIE KAR'

Godsmense wat in erge ongeluk was, vertel van wonderbaarlike oorlewing

- KHIRSTEN BOOYS

UIT die wrak ná 'n wonderwerk - dis wat hulle glo met hulle gebeur het.

Drie Godsmense het die dood vrygespring toe hulle op Vrydag 13 Junie in 'n grusame ongeluk was en die voertuig drie keer gerol het.

Kyle Daniels (25), leier van die Bethel Kerk in Gordonsbaai, en twee gemeentelede was op pad na 'n nag van gebed en diens in Macassar, toe hulle getref is deur 'n bestuurder wat glo onder die invloed van alkohol was.

Die bestuurder het op die N2 naby Boontjieskraal glo beheer oor die kar verloor.

Die kar het drie keer gerol voordat dit teen 'n betonwal tot stilstand gekom het.

Daniels vertel hulle missie was eenvoudig maar kragtig: om vir mense te bid, hulle harte voor die Here te bring en God se liefde te demonstreer.

Hy beskryf die toneel as een van absolute verwoesting.

Die bestuurskant van die kar was heeltemal ingedruk 'n aanduiding van die krag van die impak.

Daniels sê enigeen wat daar verbyry, sou gedink het dat niemand so 'n ongeluk kon oorleef nie.

Die voertuig is so erg beskadig dat dit afgeskryf is.