WONDE WORD NOU 'WEER OOPGERUK'

GATVOL en de moer in vir die regstelsel wat lyk asof dit meer die beskuldigde beskerm as die families van die slagoffers.

- 

Dis hoe die families van die omstrede undertaker Petrus Booysen se slagoffers voel.

Die begrafnisondernemer wat daarvan aangekla word dat hy verassingsertifikate vervals en die dooies as armlastiges begrawe het pleks van hulle te veras, kan glo eersdaags as 'n vry man buite loop indien die staat nie sy ondersoek binnekort voltooi nie.

Booysen, wat na bewering 'n klomp mense bedrieg het, het op 27 Mei in die Kuilsrivier-landdroshof verskyn, waar familielede van die oorledenes in afgryse gelaat is toe hulle hoor dat sy borgtog na 'n waarskuwing verander is en sy borgtoggeld aan hom terugbetaal is.

Die saak is tot 11 Junie uitgestel vir nader ondersoek.

Die oponthoud is glo sodat 'n hofbevel bekragtig moet word en die slagoffers se oorskotte opgegrawe kan en DNS-toetse gedoen word om die identiteite daarvan te bepaal.