VERRASSINGS VROEG IN COKE CUP

DIE prelims van die gewilde Coke Cup het reeds sy eerste groot naam geëis - en die general secretary van Safa Cape Town, Reyaad Joseph, glo daar gaan nog baie verrassings dié seisoen in die uitklopreeks kom.

- SPORTREDAKSIE

Die naaswenner van twee seisoene gelede, Goulburn Athletic van Bonteheuwel, het in 'n klipharde wedstryd op Rygate sy rieme teen Jordan Callies styfgeloop.

"Dit is nie 'n kompetisie vir die faint-hearted nie," het Joseph, wat Sondag op die Johnson Road-sportveld in Rylands was, gesê.

Die Coke Cup-toernooi is vanjaar in sy 30ste seisoen en Joseph verwag dat die standaard van sokker in die "Kaap se eie FA Cup-reeks" nog beter gaan wees as verlede jaar se humdinger van 'n kompetisie, toe Vasco da Gama in die eindstryd met FC Tafelzucht in die Athlone Stadium afgereken het.