Lucan kom tot die vrou se redding en stof gangsters af

Elda Balie is een van daardie huiswinkeleienaars hier in Manenberg wat weier om protection money te betaal. Nou moet sy vanaand boet daarvoor.

- 

Een van die skurke druk 'n gun teen haar kop, ten aanskoue van almal in die straat. Haar bure is in die middel van die nag uit hulle diep slaap gewek deur haar angsgille. Niemand waag dit egter om iets te doen nie. Hulle moet maar net toekyk hoe hierdie geliefde inwoner voor hulle oë doodgeskiet word. Sy wat altyd uit haar pad gegaan het om haar medemens te help.

"Jy moes nooit geweier het om te betaal nie. Nou gaan ons jou sat maak. En jou huiswinkel afbrand," sê die skurk. Sy vinger krul om die sneller van die pistool.

Elda knyp haar oë toe, vou haar hande en laat sak haar kop. Sy prewel saggies 'n gebed.

'n Gil klink skielik uit een van die jaarte af op. Almal se koppe draai in daardie rigting. Selfs die gangsters swaai om en kyk verbaas na 'n bejaarde man wat daar in sy jaart staan en bewerig na iets bokant hom beduie.

Nou ruk almal se kop op na waar hy beduie. Vir 'n oomblik weet niemand presies wat nou daar in die lug besig is om te gebeur nie.

Al wat hulle kan uitmaak, is die skeur wat sommerso daar uit die niet in die lug verskyn. Terwyl almal nog wonder oor die snaakse fenomeen, weergalm 'n donderslag deur die gebied. Groen weerligstrale skiet uit die skeur soos dit groter oopgeruk word.

Almal ruk soos hulle skrik.

Toe gebeur iets wat hulle nog nooit voorheen aanskou of ervaar het nie. Uit daardie skeur kom 'n vreemde, menslike wese te voorskyn. Van kop tot tone in swart bedek, met 'n donker mantel wat agter sy rug wapper. Die hele figuur is gebaai in 'n helder groen lug.