TROUE-VREUGDE BRING TRAGEDIE

Pleks van feesvier vloei die trane ná drie oppad na troue in ongeluk sterf

- Chrislynn Sias-Louw

WAT veronderstel was om 'n besoek propvol liefde en geluk te wees, het tragies geëindig toe 'n ma en dogter en dié dogter se beste vriend op slag dood is in 'n ongeluk op pad Namibië toe.

Die drietal - Shahida Jooste (26), Carol Jooste (54) en Matthew Kotzé (26) - was op pad na 'n troue in Walvisbaai, saam met twee ander voertuie, maar dié drie het nooit hulle eindbestemming gehaal nie.

Shahida sou strooi, Matthew sou foto's neem en Carol sou hulp verleen waar dit die dekor betref. Hulle hartseer families gaan nou egter moet bruilof vier sonder hulle teenwoordigheid.

Wanneer jy familie en vriende vra oor Matthew en Shahida se verhouding, is die opsomming dat hulle mekaar se ride or die's was. Die twee was albei aspirant-akteurs en het selfs saamgewerk aan 'n internasionale produksie in Kaapstad.

Bernice Jooste, Carol se skoondogter, vertel sy en haar man was in een van die ander voertuie wat saam met die drie op pad was Namibië toe. Hulle het vooruit gery.

"Later die aand het hulle nie hier uitgekom nie en ons het gehoor daar was 'n ongeluk. Op daardie tydstip het ons geweet dis 'n ernstige ongeluk, maar het nie met sekerheid geweet dat hulle wel betrokke was nie."

Die gevreesde nuus het etlike ure later gekom: Die drie is op slag dood.