Plannu gardd cymunedol

'RYDW i newydd fod yn yr Ardd Wyllt, gan ei bod yn fore Mercher ac 'roedd yn dangnefeddus yno. Os nad ydych wedi bod yno, mae modd ei gweld ym Mhenygroes - drws nesaf i'r Co-op mae hi.

- Angharad Tomos

AM ddeugain mlynedd, bu'n dir diraen, a neb yn cymryd cyfrifoldeb drosto.

Tua tair blynedd yn ôl, un o gynlluniau cyntaf Yr Orsaf (menter gymunedol yn Nyffryn Nantlle) oedd creu gofod gwyrdd cymunedol, a dyma holi'r Cyngor a gaem wneud rhywbeth efo'r darn ger y Co-op.

Rŵan, mae pwy bynnag sy'n ddigon hen i gofio fy ngholofnau cynnar yn y 90au o bosib yn cofio ambell Golofn Arddio y byddwn yn ei sgwennu. Ron i newydd ddod yn berchen tŷ, a gardd, a dyma feddwl y byddwn yn rhannu rhai profiadau gyda'r darllenwyr. Ron i'n llawn brwdfrydedd, ond heb brofiad o unrhyw fath yn y byd. Sylweddolais wedi rhai blynyddoedd fod cadw gardd yn golygu gwaith caled, a hwnnw'n waith ail-adroddus yn aml. A minnau heb fy mendithio ag amynedd, collais ddiddordeb.

Felly ron i'n nabod fy hun yn ddigon da i wybod nad fi oedd y person gorau i wirfoddoli i'r Clwb Garddio. Ond yn niffyg pobl eraill, ac o ddeall fod 'pawb yn ddechreuwyr', dyma ddechrau mynd bob bore Mercher. O edrych ar y darn o dir, ron i'n amheus iawn a fyddai unrhyw beth yn tyfu yno. Rydw i'n gallu torchi fy llewys, a dan arweinyddiaeth Gwenllian, dyma gychwyn ar y gwaith. Wedi dwy awr, roeddem wedi ymládd. Doeddwn i erioed wedi gweld darn o dir efo cymaint o sbwriel ynddo. Yn bapur da da, plastig, hen ddeunydd wedi pydru, beic wedi ei luchio - roedd hi am fod yn broses hir...