પોતાના ઘરમાં જ નહીં, અન્ય હિલાનાં જીવનમાં પણ ફેલાવી... સફળતાની મીઠાશ!

સ્વભાવે અંતર્મુખી એ મહિલા ઈન્ટિરિયર ડિઝાઈનર તો બની, પરંતુ લોકોનાં ઘરને સજાવવાને બદલે ઘરેથી રસોઈકળાથી નાની સ્ટાર્ટ-અપ કંપની શરૂ કરી અન્ય મહિલાનાં જીવન સજાવ્યાં. આ અમદાવાદી માનુનીની ચૉકલેટ્સનો સ્વાદ દેશ-વિદેશની દાઢે વળગ્યો છે.

- હેતલ રાવ

ગુજરાતના સુરેન્દ્રનગર જિલ્લાના ધ્રાંગધ્રા તાલુકાના નાનકડા ગામ સોલડીમાં જન્મેલી એક અંતર્મુખી, શરમાળ દીકરી. એનું નામ અંકિતા. પિતા પ્રેમજીભાઈ પટેલ ખેતી કરે, માતા ભગવતીબહેન ઘરમાં જ નાનાંમોટાં સિલાઈકામ કરે. ત્રણ ભાઈ-બહેનમાં અંકિતા સૌથી નાની. માતાને ઘરે કામ કરતાં જોઈ એને વિચાર આવે કે મોટી થઈને હું પણ પગભર બનીશ.

આજે એ શરમાળ, અંતર્મુખી છોકરી અંકિતા અમદાવાદના પાલડી વિસ્તારમાં પોતાના ઘરમાં ચૉકલેટ બનાવીને વેચાણ કરે છે. આજે ચૉકો બ્લોસમ જેવા સફળ વ્યવસાયનું નામ છે, એ એક સામાન્ય ગૃહિણીનાં સાહસ, સંકલ્પ અને અતૂટ શ્રદ્ધાનું અનોખું ઉદાહરણ છે. ઘરે ચૉકલેટ બનાવીને આજે એ અનેક મહિલાઓને પગભર બનાવવા માટે પણ નિમિત્ત બની રહ્યાં છે. અહીં સુધી પહોંચવું એ અંકિતા માટે બહુ મોટી સિદ્ધિ હતી, કારણ કે એ ગૃહિણી હતાં, ઘણું ઘણું શીખવું પડ્યું. એ પણ ચોક્કસ તાલીમ અને અનુભવ મેળવ્યા બાદ.

અંકિતાએ પ્રાથમિક અભ્યાસ સોલડી ગામની જ શાળામાં કર્યો. સાત ધોરણ પછી ઉચ્ચ અભ્યાસ કડી, ગાંધીનગરની હૉસ્ટેલમાં રહીને કર્યો, જ્યારે એમ.કૉમ (માસ્ટર ઑફ કૉમર્સ) માટે અમદાવાદ આવવાનું થયું.

અભ્યાસ પૂર્ણ થતાં જ પિતાએ અમદાવાદના બિઝનેસમૅન કેતનભાઈ પટેલ સાથે ૨૦૦૭માં અંકિતાનાં લગ્ન કર્યાં. પતિની ઈચ્છા હતી કે અંકિતા કંઈ કામ કરે, આર્થિક સધ્ધરતા માટે નહીં, પરંતુ પોતાના માટે આથી ૨૦૦૯માં અંકિતાએ ઈન્ટિરિયર ડિઝાઈનિંગનો કોર્સ કર્યો. જો કે આ ક્ષેત્રમાં સતત સાઈટ પર જવું પડતું એટલે એમાં આગળ વધવાનું માંડી વાળ્યું.

નિતનવા પ્રયોગ કરીને આપમેળે જ જુદી જુદી ચૉકલેટ બનાવતાં શીખવાનો સંતોષ.