પરીક્ષા આવી રહી છે... બાળકની... વધુ તો મા-બાપની

હવે પછીના બે-અઢી મહિના ભારે ન બને એ માટે જરૂરી છે સંતાનો પર બિનજરૂરી ભાર ન મૂકવાનું.

- વિશ્વા મોડાસિયા

ફેબ્રુઆરી મહિનો આવે એટલે જે ઘરમાં સ્કૂલ-કૉલેજમાં ભણનારાં બાળકો હોય ત્યાં ઉત્તેજના અને ભયનું વાતાવરણ જામવા લાગે. એક શબ્દમાં જવાબ આપવો હોય તો એ છેઃ પરીક્ષા.

એમાં પણ દસમા–બારમાની બોર્ડની પરીક્ષા કે જુદા જુદા પ્રોફેશનલ કોર્સ માટેની એન્ટ્રન્સ ટેસ્ટને બહુ ઝાઝા દિવસની વાર નથી. કોઈ પણ પરીક્ષા હોય, બાળકને થોડો ડર તો રહેવાનો જ અને એટલો જ ફડકો એમનાં માતા-પિતાને પણ હોવાનો જ. પરીક્ષા ભલે બાળકોની હોય, પણ માતા-પિતાએ પણ પરીક્ષા દરમિયાન તૈયારી કરવી પડે છે. થાય છે એવું કે બાળકોની સાથે સાથે માતા-પિતા પણ ઘણી વખત પરીક્ષાના નામે ડરી જતાં હોય છે, જેની સીધી અસર ઘરના વાતાવરણ અને એ રીતે બાળક પર થાય છે. આવી સ્થિતિમાં ઘરમાં થોડું હળવું વાતાવરણ કઈ રીતે ઊભું કરવું? આવો જોઈએ...

પરીક્ષા નજીક આવતાં જ માતા-પિતા બાળકોને નાની નાની બાબતમાં રોકટોક કરે છે. ખાસ તો પરીક્ષા દરમિયાન બાળકો આખો દિવસ વાંચ્યા જ કરે એવું ઘણાં માતા-પિતા માનતાં હોય છે અને એમનાં સંતાન પર એ માટે દબાણ પણ કરે છે, જેને કારણે બાળક ક્યારેક ડરી જાય છે અને એ પ્રેશરમાં જ સારી રીતે અભ્યાસ કરી શકતાં નથી. બાળક પર સળગા પ્રતિબંધ કે વધારે પડતાં નિયંત્રણ મૂકીને એવું દબાણ ઊભું ન કરો.