ઉંબરની બહાર, ઉંબરની ભીતર..

એકલા જીવતા કોઈ વૃદ્ધને પાછલી અવસ્થામાં નાછૂટકે કામ કરવાની નોબત આવે ત્યારે દયા આવે. અમારે ત્યાં કુરિયર સર્વિસમાં કામ કરતા સિત્તેરેક વર્ષના વૃદ્ધ અવારનવાર ડિલિવરી કરવા આવે છે

- હિતેન આનંદપરા

લ્યો વળોટીને ઉંબર હું નીકળી

આ હવે મારું ન ઘર, હું નીકળી

ચાલમાં આવી ગઈ ગંભીરતા

ને નીચી ઢાળી નજર, હું નીકળી.

                                    – ઉર્વીશ વસાવડા

વ્યક્તિત્વમાં પરિવર્તન અનેક કારણથી થતું હોય છે. મા-બાપમાંથી કોઈકના નિધનને કારણે અચાનક જવાબદારી માથે પડે ત્યારે પંદર-સોળ વર્ષનો તરુણ કે તરુણી ઘર ચલાવવા મજબૂર થાય. હિંદી ફિલ્મમાં અનેક બાળકલાકાર કપરી આર્થિક સ્થિતિમાં કામ કરી મા-બાપ માટે ટેકણલાકડી થયા છે.