રસોડાને કેમ બચાવશો ભેજથી?

ચોમાસામાં મસાલા અને અનાજથી માંડી ફળ-શાકભાજીને રાખો સલામત.

- વિશ્વા મોડાસિયા

વરસાદની ઋતુ પોતાના આગમન સાથે સ્વાસ્થ્યને લગતી તકલીફ અને જીવજંતુનો ઉપદ્રવ પણ લાવે છે. આ ઋતુની અસર સૌથી વધારે રસોડાની વસ્તુ પર જોવા મળે છે. ઘરમાં અને રસોડાના રેશનમાં જીવાત પડવાની અથવા ભેજ લાગવાથી ખરાબ થવાની સમસ્યાથી દરેક ગૃહિણી હેરાન થતી હોય છે. અલબત્ત, આ વાતાવરણમાં ગૃહિણીઓ અમુક પ્રકારનું ધ્યાન રાખીને જીવાત અને રસોડામાં ભેજને કારણે બગડતા મસાલાને સાચવી શકે છે. રસોડાના મસાલા સરળતાથી બગડી જાય છે. એક વાર આ મસાલામાં જંતુઓ મળી જાય, પછી એનો ઉપયોગ કરી શકાતો નથી.

મોટા ભાગે રસોડામાં નાના મસાલિયામાં થોડા થોડા મસાલા કાઢીને રોજિંદા ઉપયોગ માટે રાખવામાં આવે છે. જો કે એમાંથી અમુક મસાલાનો ઉપયોગ રોજ નથી થતો. ચોમાસામાં આ મસાલા બગડવાની સૌથી વધારે શક્યતા છે. આવા મસાલાને રસોઈ સમયે જ બહાર કાઢીને વાપરવા જોઈએ.

વરસાદની મોસમમાં ભેજનું પ્રમાણ વધી જાય છે, જેને કારણે મસાલામાં ગઠ્ઠા જામી જાય છે. એનો ઈલાજ છે મસાલાને થોડો સૂર્યપ્રકાશ આપવાનો. એ માટે મસાલાને બહાર કાઢવાની જરૂર નથી. મસાલાવાળાં કાચનાં વાસણોને સીધાં તડકામાં મૂકો. એ કારણે એનો સ્વાદ બગડતો નથી અને ભેજ પણ જતો રહે છે.