ગાર્ડનિંગનો પાયો એટલે માટી

માટીને ઓળખી લો તો ૯૦ ટકા બાગબાની આવડી જાય. ગાર્ડનિંગના ઘણા પ્રશ્નોના ઉત્તર માટીની ગુણવત્તા પર નિર્ભર છે. એટલે જ આ કૉલમમાં આરંભથી જ સૌથી વધારે મહત્ત્વ સારી માટી બનાવવા પર આપ્યું છે.

- પૂર્વી શાહ

ભીની સામગ્રીનું વિઘટન કરવા માટીને બેઝ બનાવીએ તો મેજિક સોઈલ બને અને સામગ્રી તરીકે સૂકાં પાંદડાં કે પૂઠાંના ઉપયોગથી કમ્પોસ્ટ બનાવી શકીએ.

માટી બનાવવી એ ધીરજનું કાર્ય છે. માત્ર ને માત્ર અનુભવથી એ આત્મસાત કરી શકાય. વેલ, તમે માટી બનાવવા માંડશો ત્યારે આનંદની સાથે ઘણા સવાલ પણ ઉદ્ભવશે, જેના જવાબ અહીં આપીએ છીએ.

અગાઉના હપ્તાઓમાં જણાવેલી પદ્ધતિથી કમ્પોસ્ટ બનાવવાનું શરૂ કર્યું હોય, પણ એના થર જરૂર કરતાં વધારે ભીનો અથવા સૂકો થઈ જાય કે એમાંથી વાસ આવવા માંડે તો પણ ગભરાઈને કમ્પોસ્ટિંગ છોડી દેવાની જરૂર નથી. કચરો ભીનો હોય તો સૂકું મટીરિયલ ઉમેરી દો અને સૂકો હોય તો થોડી છાશ કે પાણી છાંટીને એને બરાબર મિક્સ કરી દો. એકાદ દિવસ છાંયામાં હવા આવે એ રીતે ખુલ્લું રાખી દો અને પાછું માટલામાં ભરીને બનાવવાનું શરૂ કરો.

આ મિક્સચરમાંથી દુર્ગંધ આવતી હોય તો એનો અર્થ પાણી વધારે પડી ગયું છે, જેથી આખી પ્રક્રિયા ઍનઍરોબિક (હવાની ગેરહાજરી) બની રહી છે. પાણી શોષી લેવા અને હવાની અવરજવર વધારવા આ ઢગલામાં બ્રાઉન કે ડ્રાય મટીરિયલ ઉમેરીને મિક્સ કરી દેવું.