માઉન્ટ આબુ, ઉદયપુર અને કુંભલગઢ લઈ જાય છે…. રહસ્ય, રોમાંચ અને સંમોહનની દુનિયામાં!

રાજસ્થાનમાં પ્રવાસ-પર્યટન એવું અદ્ભુત છે કે તે પર્યટકોને રહસ્ય, રોમાંચ અને સંમોહનની દુનિયામાં લઈ જાય છે. ઉનાળાની મોસમમાં સુદ્ધાં રાજસ્થાન પર્યટકોને અનેક વિકલ્પ આપે છે. રાજસ્થાનનું એકમાત્ર પર્વતીય પર્યટનસ્થળ માઉન્ટ આબુ મે મહિનામાં ઉનાળુ મહોત્સવ સ્વરૂપે પર્યટકોના સ્વાગત માટે તૈયાર છે. માઉન્ટ આબુની સાથે જ ઉદયપુર અને કુંભલગઢ એવાં પર્યટનસ્થળો છે, જે દેશી અને વિદેશી પર્યટકોમાં અત્યંત લોકપ્રિય છે.

- 

માઉન્ટ આબુ

માઉન્ટ આબુમાં પર્યટકોની અવરજવર આખું વર્ષ રહેતી હોય છે, પરંતુ મે, જૂન અને ડિસેમ્બરમાં તો અહીં પર્યટકોનાં ધાડાં ઊતરી આવે છે. એને કારણે મે અને જૂન મહિનામાં અહીં ગ્રીષ્મોત્સવ (સમર ફેસ્ટિવલ) તો શિયાળામાં શરદોત્સવ (વિન્ટર ફેસ્ટિવલ)નું આયોજન થાય છે.

માઉન્ટ આબુમાં આ વખતે સમર ફેસ્ટિવલનું આયોજન ૧૨-૧૪ મેએ કરવામાં આવશે. આ એક લોક અને નૃત્ય-સંગીતનું પર્વ છે, જેમાં રાજસ્થાનના આદિવાસી જીવન તથા સંસ્કૃતિની ઝલક દેખાય છે. મજાની વાત એ છે કે એમાં રાજસ્થાની અને ગુજરાતી લોકનૃત્ય અને લોકસંગીતનો સંગમ હોય છે. ફેસ્ટિવલનો આરંભ ભવ્ય શોભાયાત્રા સાથે થાય છે. ફેસ્ટિવલ દરમિયાન નક્કી સરોવરમાં બોટ રેસ થાય છે તો ઘોડાઓની રેસ, દોરડાખેંચ, સ્કેટિંગ રેસ, બૅન્ડ શો, શામ-એ-કવ્વાલી જેવી બીજી અનેક દિલચસ્પ પ્રવૃત્તિનો પણ સમાવેશ છે. ફેસ્ટિવલના અંતે રોમાંચક આતશબાજી કરવામાં આવે છે.

નક્કી લેક

માઉન્ટ આબુ ઊંચા ખડકો, શાંત સરોવરો અને ખુશનુમા હવામાન માટે પ્રખ્યાત છે. આબુમાં ગુરુશિખર અરાવલી પર્વતમાળાનું સૌથી ઊંચું શિખર છે.

ત્યાં જાવ તો તમને એવો અનુભવ થાય કે જાણે તમે આકાશમાં વિહાર કરી રહ્યા છો અને વાદળો તમારાં કદમો તળે છે. દેલવાડા જૈન મંદિર, નક્કી લેક, સનસેટ પૉઈન્ટ તમને સંમોહનના એવા લોકમાં જઈ જાય જ્યાં તમારા મુખમાંથી તારીફના શબ્દો આપોઆપ નીકળી પડે.. રાજસ્થાનનો આ સંમોહક અને મનમોહક નજારો તમે ન જોયો હોય તો તમે શું જોયું?

ઉદયપુર નગરી

અમદાવાદથી ૨૬૫ કિલોમીટર અને માઉન્ટ આબુથી ૧૮૦ કિલોમીટર દૂર વસ્યું છે સરોવરોનું શહેર ઉદયપુર. ઉદયપુરમાં વચ્ચોવચ અનેક સરોવરો છે. ગુજરાત રાજ્યની નજીકમાં હોવાને કારણે ગુજરાત અને મહારાષ્ટ્રમાંથી મોટી સંખ્યામાં લોકો અહીં પ્રવાસે આવે છે. અહીં વિદેશી પર્યટકો પણ ઘણા આવે છે. જયપુર પછીના નંબરે ઉદયપુર આવે છે, જ્યાં વિદેશી પર્યટકો સૌથી મોટી સંખ્યામાં ફરવા આવે છે. રાણા ઉદયસિંહે ઈ.સ. ૧૫૫૯માં ઉદયપુર નગરની સ્થાપના કરી હતી અને એને મેવાડનું પાટનગર બનાવ્યું હતું.