પૂર્વોત્તર ભારતઃ આપણા દિલથી કેટલું દૂર?

શારીરિક દેખાવથી માંડી રહેણીકરણી, રીતરિવાજ, બોલી, વગેરે અનેક કારણસર શેષ ભારતથી છેટી રહી ગયેલી પૂર્વોત્તર રાજ્યોની પ્રજાને આપણે નજીક લાવવાની છે. એમને થતી અન્યાય અને અસમાનતાની લાગણી આપણે દૂર કરવાની છે.

- હીરેન મહેતા

ફરી મળી સત્તા: ત્રિપુરામાં વિજયોત્સવ મનાવી રહેલા ભાજપના કાર્યકરો.

લોકસભા પહેલાં નિર્ધારેલી નવમાંથી ત્રણ રાજ્યની વિધાનસભાની ચૂંટણી પૂરી થઈ અને એનાં પરિણામ આપણી સામે છે. મતદાન પછીના વરતારા મુજબ જ પરિણામ આવ્યું છે અને આ પરિણામે ફરી પુરવાર કર્યું છે કે ચાલે છે તો મોદી જ. ઈશાન ભારતનાં ત્રણેત્રણ રાજ્યમાં આપબળે કે બીજા પક્ષ સાથે યુતિ કરીનેય ભાજપે સત્તા જાળવી રાખી છે.

ત્રિપુરામાં ભાજપે છેલ્લી ચૂંટણીના પ્રમાણમાં નબળો દેખાવ કર્યો, પણ સરકાર બને એટલી બેઠકો જીતી. ઉત્તરાખંડ અને ગુજરાતની જેમ ત્રિપુરામાં પણ ભાજપે વિધાનસભાની મુદત પૂરી થવાને એકાદ વરસ બાકી હતું ત્યારે મુખ્ય મંત્રી બદલ્યા હતા. બહુ બોલકા બિપ્લવ કુમાર દેવને બદલી પ્રમાણમાં સૌમ્ય એવા ડૉ. માણિક સાહાને એમના સ્થાને બેસાડવાનો નિર્ણય ભાજપની તરફેણમાં ગયો.