સલમાન રશ્દી પર હુમલોઃ પોતાનો કક્કો સાચો ઠેરવવાની કવાયત

સલમાન રશ્દી: વર્ષો વીત્યાં, પણ વિવાદ શમ્યો નથી.

- 

ધર્મ કે મજહબના નામનું ઝનૂન અમુક લોકોના દિમાગમાં કેવું ઘર કરીને બેસે છે એનો તાજો દાખલો ભારતીય મૂળના લેખક સલમાન રશ્દી પરનો હિચકારો હુમલો છે. આશરે સાડા ત્રણ દાયકા અગાઉ પ્રસિદ્ધ થયેલા એમના પુસ્તક સેતાનિક વર્સેસ માટે ઈરાનના તત્કાલીન આધ્યાત્મિક વડા આયાતોલ્લાહ ખૌમેનીએ રશ્દીના મોતનો ફતવો બહાર પાડ્યો હતો.

ફતવો એટલે ધાર્મિક ફરમાન. પાછલાં કેટલાંક વર્ષોમાં મુસ્લિમ સમાજના અનેક મુલ્લામૌલવીઓએ જાતજાતના ફતવા કાઢી આ શબ્દને મજાકનું સાધન બનાવી દીધો છે, પણ હજી રૂઢિચુસ્ત જીવન જીવતા મજહબ-પારાયણ મુસ્લિમો માટે ફતવો એ અલ્લાહનું ફરમાન ગણાય છે. કેટલાક કટ્ટરવાદીઓ એનું પોતપોતાની રીતે અર્થઘટન કરે છે એ અલગ વાત છે.