કચ્છ વધુ એક વખત યુદ્ધના માહોલનું સાક્ષી

પહેલગામના આંતકી હુમલા પછી દેશની સીમાએ ખેલાયેલા યુદ્ધ વખતે કચ્છે ભારે તણાવ ભોગવ્યો છે. યુદ્ધ વિમાનોની વધેલી અવરજવર, ડ્રોન અને મિસાઇલના હુમલા, સતત વાગતી સાયરન, રાતના બ્લેકઆઉટ. ભલે થોડા દિવસ જ આવો માહોલ રહ્યો, પરંતુ કચ્છને અગાઉના યુદ્ધની યાદ તાજી કરાવતો ગયો. આજે ભારતની સૈન્ય તાકાત પાકિસ્તાનને ભૂ પાઈ દેવા સક્ષમ હોવા છતાં અને કચ્છ સીમાએ ભારે નુકસાન થયું ન હોવા છતાં સામાન્ય લોકોના મનમાં ક્યારે શું થશે, તેની તનાવભરી દહેશત તો જોવા મળી જ હતી.

- સુચિતા બોઘાણી કનર

પહેલગામ પર થયેલા આતંકી હુમલા બાદ સમગ્ર દેશે અનુભવેલો રોષ કચ્છના લોકોએ પણ અનુભવ્યો છે. તેઓ પણ નાપાક તત્ત્વોને કાયમી પાઠ ભણાવાય તેવું ઇચ્છી રહ્યા છે. આવા સમયમાં ભારતે કરેલા ઑપરેશન સિંદૂરને બધા જ વધાવી રહ્યા છે. પાકિસ્તાને ભારતીય સીમા પર કરેલા હુમલાના કારણે કચ્છમાં પણ લોકોમાં ઉચાટ હતો. પાકિસ્તાને કચ્છના સીમાવર્તી વિસ્તારો ઉપરાંત ભુજ અને આદિપુર સહિતના શહેરી વિસ્તારો પર ડ્રોન હુમલા કરતાં લોકોમાં થોડા ભયની લાગણી સાથે પાકિસ્તાનીઓને પાઠ તો ભણાવવો જ જોઈએ એ લાગણી વધુ બળવત્તર હતી. અમને ભલે થોડી મુશ્કેલી પડે, તે વેઠી લઈશું પરંતુ દેશની, સેનાની સાથે જ રહીશું, જ્યાં જરૂર પડે ત્યાં મદદ કરવા તૈયાર રહીશું, એ પણ કચ્છીઓની ભાવના હતી. આ ભાવનાનાં દર્શન ગ્રામ કચ્છમાં વધુ થયા હતા.

જમ્મુ અને કાશ્મીર, પંજાબની સાથે-સાથે હવે ગુજરાતની કચ્છની સીમાએ તંગદિલી અનુભવાઈ રહી છે. કચ્છ દરિયાઈ અને જમીની સીમાથી પાકિસ્તાન સાથે જોડાયેલું છે, આથી તેનું સ્ટ્રેટેજિક મહત્ત્વ પણ ઘણું છે. ભુજમાં ઍરફોર્સ, આર્મી અને બીએસએફનાં મથકો આવેલાં છે. જ્યારે કંડલા અને મુન્દ્રા બે મહાબંદરો દેશની આર્થિક ધોરી નસનું મહત્ત્વનું અંગ છે. આ બધાં પાકિસ્તાન માટે મહત્ત્વનાં ટાર્ગેટ છે. ઑપરેશન સિંદૂર પછી પાકિસ્તાને કચ્છ સીમાની સામે આવેલી સિંધ સીમાએ હલચલ વધારી હોવાના સમાચાર મળ્યા હતા. ભારતની તૈયારીનો તાગ લેવા માટે શરૂઆતમાં અનમેન્ડ એરિયલ વેહીકલ (યુએવી) મોકલ્યું હતું. યુએવી એક પ્રકારનું ડ્રોન છે, પરંતુ તેના થકી મિસાઇલ્સ પણ દાગી શકાય છે અને તે હવાઈ જાસૂસીનું કામ પણ કરે છે. આ યુએવી કુરન, ધરમશાળા, ખાવડા, રિન્યુએબલ એનર્જી પાર્ક વિસ્તારમાં નોંધાયું હતું. છેલ્લે તેને તોડી પડાયું હતું. ત્યાર પછી તો ૩-૪ દિવસના સમયગાળામાં અનેક ડ્રોન હુમલા કરવા પ્રયાસ કરાયો હતો. જે તમામને ભારતે નિષ્ફળ બનાવ્યા હતા. આવી ઘટનાના સમાચાર, વીડિયો સતત લોકોને મળતાં રહેતા હોવાથી ઉચાટ પણ ફેલાયો હતો. જોકે જ્યાં ડ્રોન દેખાયું તેને તોડી પડાયું તે વિસ્તારના લોકો તો તેનાથી ડરવાના બદલે તેનો વીડિયો ઉતારવામાં મગ્ન હતા. લોકો ડરીને ભાગ્યા ન હતા. આ ઘટના સરહદી વિસ્તારના લોકોની માનસિકતા અને ખુમારીનાં દર્શન કરાવે છે.