ബേക്കറി ഉൽപന്നങ്ങളിൽ 25%വരെ ലാഭം പ്രവാസിയുടെ വേറിട്ട വിജയസംരംഭം

ഒമാനിൽ ഭക്ഷ്യ ഉൽപന്നങ്ങളുടെ നിർമാണ പ്ലാന്റുകളുടെ ചുമതല നോക്കിയിരുന്നു. ആ അനുഭവസമ്പത്ത് ആത്മവിശ്വാസം പകർന്നു. ഏറെക്കാലത്തെ പഠനത്തിനും നിരീക്ഷണത്തിനും ശേഷമാണ് സംരംഭം തുടങ്ങിയത്.

- ടി.എസ്.ചന്ദ്രൻ മുൻ ഡെപ്യൂട്ടി ഡയറക്ടർ, സംസ്ഥാന വ്യവസായ-വാണിജ്യവകുപ്പ്

21 വർഷക്കാലത്തെ ഒമാനിലെ പ്രവാസ - ജീവിതം അവസാനിപ്പിച്ചു തിരിച്ചെത്തിയപ്പോൾ സ്വന്തമായൊരു ബിസിനസ് എന്നതായിരുന്നു മാവേലിക്കരക്കാരനായ സജിയുടെ സ്വപ്നം. എന്നാൽ എടുത്തുചാടാൻ തയാറായിരുന്നില്ല. ചിന്തിച്ച്, ഏറെക്കാലത്തെ പഠനത്തിനും നിരീക്ഷണത്തിനും ശേഷം കണ്ടെത്തിയ ആശയം സംരംഭമായി മാറിയതിന്റെ ആഹ്ലാദത്തിലാണ് ഇന്ന് അദ്ദേഹം.

എന്താണ് ബിസിനസ്?

മാവേലിക്കരയ്ക്കടുത്ത് ഓലകെട്ടിയമ്പലത്തെ കെ.ടി. ഫുഡ്സ് ആൻഡ് സ്വീറ്റ്സ് എന്ന സ്ഥാപനത്തിൽ ബ്രൗൺ ബ്രഡ് ആണ് പ്രധാന ഉൽപന്നം. ലൈഫ് സ്റ്റൈൽ രോഗങ്ങൾ വർധിച്ചുവരുന്ന ഇക്കാലത്ത് അത്തരക്കാർക്ക് കുറഞ്ഞ നിരക്കിൽ ദിവസവും കഴിക്കാവുന്ന ഭക്ഷണം ലഭ്യമാക്കുക എന്നതായിരുന്നു ആശയം. പ്രമേഹം മൂലം കഷ്ടപ്പെടുന്നവർക്ക് അത്തരത്തിൽ ആശ്രയിക്കാവുന്നതാണ് ബ്രൗൺ ബൗഡ് എന്നു പഠനങ്ങളിൽ നിന്നു മനസ്സിലാക്കിയാണ്സം രംഭം ആരംഭിച്ചത്. എന്നാൽ വിറ്റുവരവ് മെച്ചപ്പെടണമെങ്കിൽ ബ്രെഡ് മാത്രം പോരാ എന്നു തിരിച്ചറിഞ്ഞതോടെ മറ്റു ബേക്കറി ഉൽപന്നങ്ങളും നിർമിച്ചു വിൽക്കാൻ തുടങ്ങി. വൈറ്റ് ബ്രഡ്, ബൺ, ബൺ ക്രീം റോൾ, ഫ്രൂട്ട് ബൺ, അങ്കിൾ ബൺ, കുക്കീസ്, റസ്ക്, ബേബി റസ്ക്, കപ് കേക്ക്, സ്ലൈസ് കേക്സ്, പീനട്ട് കുക്കീസ്, പഫ്സ്, ചിക്കൻ റോൾ അങ്ങനെ നീളുന്നു ഉൽപന്ന നിര. എങ്കിലും പ്രാധാന്യം ബ്രൗൺ ബ്രെഡിനുതന്നെ. അതു വ്യത്യസ്തമായ രീതിയിൽ ചെയ്തു വരുന്നു, ആട്ട മാത്രമായും ആട്ടയ്ക്കൊപ്പം മില്ലറ്റു കൂടി ചേർത്തും ഇവ ഉൽപാദിപ്പിക്കുന്നു. ഫ്രഞ്ച് അവ്ൻ എന്ന ബ്രാൻഡിലാണ് വിൽപന.