മ്യൂച്വൽഫണ്ട് നിങ്ങൾ അറിയേണ്ടതും ചെയ്യേണ്ടതും വിദഗ്ധർ പറയുന്നു

ഓഹരി വിപണിയിൽ തിരുത്തൽ തുടരുന്നതും ബാങ്ക് പലിശ കുത്തനെ കുറയുന്നതും നിക്ഷേപകരെ ആശങ്കയിലാക്കുന്നു. അതേസമയം മ്യൂച്വൽ ഫണ്ടുകളെ ആശ്രയിക്കുന്നവരുടെ എണ്ണം കൂടുകയാണ്. ഈ സാഹചര്യത്തിൽ മ്യൂച്വൽ ഫണ്ട് നിക്ഷേപത്തിൽ നഷ്ടം കുറയ്ക്കാനും പരമാവധി നേട്ടമെടുക്കാനും സഹായകമായ വിദഗ്ധരുടെ നിർദേശങ്ങൾ

- നന്ദ് കിഷോർ, മാനേജിങ് ഡയറക്ടർ, സിഇഒ എസ്ബിഐ മ്യൂച്വൽ ഫണ്ട്

പലിശ കുറയുന്നു; മ്യൂച്വൽ ഫണ്ടുകൾ ഉപയോഗപ്പെടുത്തുക

നന്ദ് കിഷോർ, മാനേജിങ് ഡയറക്ടർ, സിഇഒ, എസ്ബിഐ മ്യൂച്വൽ ഫണ്ട്

ആർബിഐ പലിശ നിരക്കുകൾ കുറച്ചതോടെ സ്ഥിരനിക്ഷേപങ്ങളെ ആശ്രയിക്കുന്നവരുടെ വരുമാനം ഇനിയും ഗണ്യമായി കുറയും. ഈ സാഹചര്യത്തിൽ, മ്യൂച്വൽ ഫണ്ടുകളിൽ അനുയോജ്യമായ പദ്ധതികൾ കണ്ടെത്താനും നിക്ഷേപിക്കാനു നേട്ടങ്ങൾ കൊയ്യാനും നിക്ഷേപകർ തയാറാകണം.

പറയുന്നത് ഇന്ത്യയിലെ ഏറ്റവും വലിയ മ്യൂച്വൽ ഫണ്ട് കമ്പനിയായ എസ്ബിഐ മ്യൂച്വൽ ഫണ്ടിന്റെ എംഡിയും സിഇഒയുമായ നന്ദ് കിഷോർ. കൂടു തൽ ആളുകളെ സമ്പത്തു സൃഷ്ടിക്കുന്നതിലേക്ക് (വെൽത്ത് ക്രിയേഷൻ) കൊണ്ടുവരിക എന്നതാണ് കമ്പനിയുടെ പ്രധാന ലക്ഷ്യമെന്നും ഒരു മലയാളി എന്ന നിലയിൽ, കേരളത്തിൽനിന്നു കൂടുതൽ പേർ മ്യൂച്വൽ ഫണ്ടിലേക്ക് എത്തുന്നതു കാണാനാണ് താൻ ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു രാജ്യത്തുടനീളം മ്യൂച്വൽ ഫണ്ടുകളുടെ നേട്ടങ്ങൾ എത്തിക്കുന്നതിന് എസ്ബിഐ നടത്തുന്ന ശ്രമങ്ങളെ ക്കുറിച്ചും മ്യൂച്വൽ ഫണ്ടുകളിലെ അവസരങ്ങളെയും സാധ്യതകളെയുംകുറിച്ചും അദ്ദേഹം മനോരമ സമ്പാദ്യത്തോടു സംസാരിക്കുന്നു.

മ്യൂച്വൽ ഫണ്ടുകൾ ഉപയോഗിക്കുക

ആറു മാസമായി നടപ്പിലാക്കിയ നിരക്കു കുറയ്ക്കൽ കാരണം പലിശ ഗണ്യമായി കുറഞ്ഞു. അതിനാൽ, മ്യൂച്വൽ ഫണ്ടുകളിലേക്കു കൂടുതൽ നിക്ഷേപങ്ങൾ എത്തുമെന്നു പ്രതീക്ഷിക്കാം.

പലിശ കുറയുന്നതു നിക്ഷേപകരെ ആശങ്കപ്പെടു ത്തും. ഈ സാഹചര്യത്തിൽ, അവർ ഇതര നിക്ഷേപ ഓപ്ഷനുകൾ നോക്കണം. ഇന്ത്യയിലെ ഒരു വലിയ വിഭാഗം നിക്ഷേപകരും പണത്തിന്റെ സുരക്ഷയ്ക്കു കൂടുതൽ പ്രാധാന്യം നൽകുന്നവരാണ്. അതേ സമയം, ബാങ്കു നിക്ഷേപങ്ങളെക്കാൾ അൽപം കൂടുതൽ വരുമാനം അവർ ആഗ്രഹിക്കുന്നുമുണ്ട്. വ്യത്യസ്തതരം നിക്ഷേപകർക്കായി പ്രത്യേകം തയാറാക്കിയ സ്കീമുകൾ മ്യൂച്വൽ ഫണ്ടിലുണ്ട്. അതിൽനിന്ന് അനുയോജ്യമായതു കണ്ടെത്തി ഉപയോഗപ്പെടുത്തുകയാണ് നിക്ഷേപകൻ ചെയ്യേണ്ടത്.

ഓഹരി വിപണി ഇപ്പോൾ വളരെ അസ്ഥിരമാണ്, കോവിഡിനുശേഷം എത്തിയ നിക്ഷേപകർ ആദ്യമായാണ് ഇത്തരം സാഹചര്യം നേരിടുന്നത്. അവരോട് എന്താണു പറയാനുള്ളത്?