വീട്: ഓർമകൾ നിറയുമിടം

ഭിത്തികൾക്കും അലങ്കാരങ്ങൾക്കുമപ്പുറം വീടിനെ വീടാക്കുന്ന ചിലതുണ്ടെന്നു പറയുന്നു പർവിൺ ഹഫീസ്

- സോന തമ്പി

വളഞ്ഞൊഴുകുന്ന ഡ്രൈവ് വേയിലൂടെ, ക്ലാഡിങ് ചെയ്ത മതിലിനും, മുളങ്കൂട്ടത്തിനുമിടയിലൂടെ പ്രശസ്ത ലാപ്രോ സ്കോപിക് സർജൻ ഡോ. ഹഫീസ് അൻസാരിയുടെയും സൺറൈസ് ഹോസ്പിറ്റൽസ് മാനേജിങ് ഡയറക്ടർ പർവീണിന്റെയും വീട്ടിലെത്തുമ്പോൾ മറ്റൊരു ലോകത്തെത്തിയ പോലെ തോന്നും.

വീട്ടിലേക്കാൾ അധികം സമയം ആശുപത്രിക്കു വേണ്ടി മാറ്റി വച്ചാലും, പർവീൺ ഹഫീസ് എന്ന സൂപ്പർ ആതിഥേയ അവിടെ നിങ്ങളെ കാത്തിരിപ്പുണ്ടാവും. താനൊരു ഡിസൈൻ തല്പരയല്ല, പക്കാ കണക്കുകാരി' യാണ്, ഭർത്താവാണ് ഇന്റീരിയറിന്റെ ചുക്കാൻ എന്ന ക്ഷമാപണത്തോടെ പർവീൺ വീടിനെ പറ്റി പറഞ്ഞതു മുഴുവൻ ഇമ്പമുള്ള കഥകൾ...

12 വർഷം മുമ്പാണ് ഞങ്ങളിവിടെ വീട് വച്ചത്. കുത്തനെ ചരിവുള്ള, നെൽപ്പാടത്തോടു ചേർന്നുള്ള മനോഹരമായ പ്ലോട്ടാണിത്. കാക്കനാട്ട് ഇന്നു കാണുന്ന പോലെ വികസനമൊന്നും അന്നുണ്ടായിരുന്നില്ല. പക്ഷേ, എന്തോ ഒരു പോസിറ്റിവിറ്റി ഞങ്ങൾക്കു തോന്നി. ഭർത്താവാണ് വീടിന്റെ ഇന്റീരിയർ മുഴുവൻ പ്ലാൻ ചെയ്തത്. ടർക്കിയിൽ പോയപ്പോൾ അവിടെ കണ്ട പില്ലറുകളും സ്റ്റോണുമൊക്കെ അദ്ദേഹത്തിന് വളരെ ഇഷ്ടപ്പെട്ടു. എക്സിക്യൂഷൻ റോൾ മാത്രമാണ് എനിക്ക്.

വീട് വീടാവുന്ന മുഹൂർത്തങ്ങൾ

വീട് എന്നാൽ "ഹൗസ്'അല്ല, 'ഹോം'ആവണമെന്നതാണ് എന്റെ കാഴ്ചപ്പാട്. വീടിനകത്ത് നമ്മുടെ പ്രിയപ്പെട്ട ഓർമകൾ നിറയണം. ഈ വീടിന്റെ ഓരോ ഇടത്തും ഇഷ്ടംപോലെ ഓർമകളുണ്ട്.