കരയിലിറങ്ങി കൃഷിക്കാരനായി

കോഴിക്കോട് നഗരത്തിലെ വീടിനു ചുറ്റും കൃഷി

- 

കഷ്ടിച്ച് 20 സെന്റ് സ്ഥലത്താണ് കോഴിക്കോട് കല്ലായി സ്വദേശി എ.പി. കുഞ്ഞഹമ്മദുകോയയുടെ വീട്. എന്നാൽ വീടിനുചുറ്റുമുള്ള ചെറുമുറ്റത്ത് പഴം പച്ചക്കറികളുടെയും പൂച്ചെടികളുടെയും വലിയ ലോകം തീർത്തിരിക്കുകയാണ് ഈ 73 കാരൻ. കണ്ണഞ്ചേരി എൽപി സ്കൂളിനു സമീപമുള്ള അക്വാമറീൻ വീട്ടിലെത്തിയാൽ ആർക്കും വെറും കയ്യോടെ മടങ്ങേണ്ടിവരാറില്ല, സുഹൃത്തുക്കൾക്ക് വിളഞ്ഞ പഴങ്ങളോ പച്ചക്കറികളോ കൊടുത്തുവിടാൻ കുഞ്ഞഹമ്മദിനും ഭാര്യ ഹമീദാബാനുവിനും ഉത്സാഹമേറെ. വരുന്നവർക്കെല്ലാം നൽകാൻ മാത്രം വിളസമൃദ്ധിയും വൈവിധ്യവും ഇവിടെയുണ്ട്. പലതരം മുളകുകൾ, വെണ്ട, വഴുതന, കോളിഫ്ലവർ, കാബേജ്, തക്കാളി, മത്തൻ, കുമ്പളം, ചിരങ്ങ, കൈപ്പ (പാവൽ), ചീര, മഞ്ഞൾ ഇഞ്ചി, കറിവേപ്പില എന്നിങ്ങനെ പട്ടിക നീളുകയാണ്. പഴവർഗങ്ങളിൽ ചക്ക, മാങ്ങ, മുന്തിരി, മൾബറി, സപ്പോട്ട, ഫാഷൻ ഫ്രൂട്ട്, ഡ്രാഗൺ ഫ്രൂട്ട്, കശുമാങ്ങ, മധുരനാരങ്ങാ, ചാമ്പയ്ക്ക്, പപ്പായ, വാഴപ്പഴം പേരയ്ക്ക്, ഇലുമ്പിപുളി എന്നിവയും സുലഭം. പുതുമ ചോരാതെയും വിഷമയമില്ലാതെയും ഇവ കിട്ടുമ്പോൾ ഏതു നഗരവാസിയാണ് സന്തോഷിക്കാതിരിക്കുക! പഴം-പച്ചക്കറികൾക്കു പുറമേ മനോഹരമായ ചെറു പൂന്തോട്ടത്തിനും 8 തെങ്ങിനും 25 കമുകിനും ഇവിടെ ഇദ്ദേഹം സ്ഥലം കണ്ടെത്തിയിരിക്കുന്നു. എല്ലാ കമുകിലും കുരുമുളക് പടർത്തിയിട്ടുണ്ട്. കൂടാതെ, ഇരുപതോളം