ആദായമധുരം കിനിയുന്ന തേനീച്ചകൾ

പ്രതിവർഷം 50,000 ലീറ്ററിലധികം തേൻ വിപണിയിലെത്തിക്കുന്ന ഫിലിപ് മാത്യു തേനീച്ചവളർത്തലിനുള്ള ഉപകരണങ്ങളും സംരംഭകർക്കു പരിശീലനവും നൽകുന്നു

- 

കുമളിയിലെത്തുന്ന ടൂറിസ്റ്റുകൾ ഈച്ചകളെ വളർത്തുന്ന വീട് അന്വേഷിക്കുന്നതു കണ്ടാൽ അതിശയിക്കേണ്ട. അവർ തേടുന്നത് തേനീച്ചക്കർഷകനായ വട്ടം തൊട്ടിയിൽ ഫിലിപ് മാത്യുവിന്റെ വീടാണ്. തേക്കടിയിലേക്കുള്ള യാത്രയിൽ നല്ല തേൻ വാങ്ങുകയാണ് അവരുടെ ലക്ഷ്യം. ഒപ്പം തേനീച്ചവളർത്തലിന്റെ കൗതുകക്കാഴ്ചകൾ കണ്ടു മനസ്സിലാക്കുകയും.

ഫിലിപ് മാത്യു, വട്ടത്തൊട്ടിയിൽ ഫിലിപ് മാത്യു എന്നു പറഞ്ഞാൽ നാട്ടുകാർക്കു മനസ്സിലായെന്നുവരില്ല. എന്നാൽ, തേനീച്ച ഫിലിപ് എന്നു പറഞ്ഞാൽ തിരിച്ചറിയാത്തവർ ആരുമുണ്ടാവില്ല താനും. പെട്ടികളിൽ തേനീച്ചകൾ അറകളുണ്ടാക്കി തേൻ നിറയ്ക്കുന്നതും റാണിയീച്ച മുട്ടയിടുന്നതും പുതിയ ഈച്ചകൾ വിരിയുന്നതും തേനെടുക്കുന്നതുമൊക്കെ അദ്ദേഹവും കുടുംബാംഗങ്ങളും കാണിച്ചു കൊടുക്കുമ്പോൾ സഞ്ചാരികൾ കൗതുകത്തോടെ കണ്ടുനിൽക്കും.

ഫിലിപ്പിന്റെ പുരയിടത്തിലും പരിസരത്തുമായി നൂറിലേറെ തേനീച്ചപ്പെട്ടികളും അറുനൂറിലേറെ ചെറുതേനീച്ചക്കൂടുകളുണ്ട്. തേനിനെയും തേനീച്ചകളെയും സ്നേഹിച്ച് ജീവിതം മധുരതരമാക്കുന്ന ഈ സംരംഭകന് ദേശീയ അവാർഡിനു പുറമേ, ഒരു ഡസനിലേറെ സംസ്ഥാനതല അവാർഡുകളും ലഭിച്ചിട്ടുണ്ട്. നൂറുകണക്കിനുപേർക്ക് ഉപജീവനമാർഗമൊരുക്കാനും ഫിലിപ്പച്ചന്റെ സംരംഭത്തിനു കഴിയുന്നു. 1993 ൽ കുമളിയിലേക്കു കുടിയേറിയ ഫിലിപ്പച്ചൻ ഇന്ന് കേരളത്തിലെ ഏറ്റവും മികച്ച തേൻ ഉൽപാദകരിൽ ഒരാളാണ്.