സൂക്ഷിക്കുക, കന്നുകാലിക്ക് ഭക്ഷ്യവിഷബാധ ഭീഷണി

കപ്പ മുതൽ മണിച്ചോളം വരെ

- ഡോ. എം. മുഹമ്മദ് ആസിഫ്

തൊടുപുഴ വെള്ളിയാമറ്റത്തെ കുട്ടിക്കർഷകനായ മാത്യു ബെന്നിയുടെ 13 ഉരുക്കൾ കപ്പത്തൊണ്ടിലെ വിഷം ബാധിച്ചു കൂട്ടത്തോടു ചത്തത് പോയ മാസം കേരളം കേട്ട ഏറ്റവും വേദനിപ്പിക്കുന്ന വാർത്തയായിരുന്നു. കപ്പത്തൊണ്ടിൽ പ്രകൃത്യാ അടങ്ങിയ സയനൈഡ് വിഷമാണ് കാലികളുടെ ജീവനെടുത്തത്. വിശന്നിരുന്ന കാലികൾക്ക് കപ്പയുടെ തൊണ്ട് കൂടിയ അളവിൽ ഒറ്റയടിക്കു നൽകിയതാണ് അപകടത്തിന്റെ ആഘാതം കൂട്ടിയത്. അധിക അളവിൽ പശുക്കളുടെ ഉള്ളിലെത്തിയ കപ്പത്തൊണ്ടിൽനിന്നു മാരകമായ സയനൈഡ് കൂടിയ അളവിൽ പുറത്തുവരികയും രക്തത്തിലേക്കു കലരുകയും മിനിറ്റുകൾക്കകം പശുക്കൾ പിടഞ്ഞുവീണു ചാകുകയുമായിരുന്നു.

ഉള്ളിലെത്തിയാൽ ഉടനടി മരണം

കപ്പയുടെ സ്വഭാവമനുസരിച്ചും സസ്യഭാഗങ്ങൾക്കനുസരിച്ചും സയനൈഡ് വിഷത്തിന്റെ തോതിൽ വ്യത്യാസമുണ്ടാവും. ചുവന്ന തണ്ടുള്ള കപ്പയിൽ ഉള്ളതിനെക്കാൾ കൂടുതൽ സയനൈഡ് വിഷം പച്ചത്തണ്ടുള്ള കപ്പയിലുണ്ടാവും. കപ്പയുടെ കിഴങ്ങിൽ ഉള്ളതിന്റെ 10 മടങ്ങ് സയനൈഡ് വിഷം കപ്പയിലയിലുണ്ട്, തളിരിലകളിൽ വിഷത്തിന്റെ അളവ് കൂടും. കപ്പയുടെ കിഴങ്ങിലുള്ളതിനെക്കാൾ 10-30 മടങ്ങ് അധികം സയനൈഡ് സാന്നിധ്യം കപ്പയുടെ പുറന്തൊണ്ടിലുണ്ട്. കള്ള അഥവാ കട്ടുള്ള കപ്പയിൽ പൊതുവേ സയനൈഡ് അളവ് ഏറും. ചൂടാക്കുമ്പോഴും ഉണക്കുമ്പോഴും വെള്ളത്തിലിട്ട് കുതിർക്കുമ്പോഴും സയനൈഡിന്റെ അംശം കുറയും.