നായപരിശീലനത്തിൽ ആശാന്മാരുടെ ആശാൻ

 ബിഎസ്എഫിൽ ഡോഗ് ട്രെയിനറായിരുന്നു സഞ്ജയൻ

- ഐബിൻ കാണ്ടാവനം

കണ്ടാൽ ഭയങ്കരന്മാരായ നായ്കൾ ഉടമ പറയുന്നത് അതേ പടി അനുസരിക്കുന്നത് കണ്ടിട്ടില്ലേ? ഉടമയുടെ മനസ്സറിഞ്ഞു പെരുമാറാൻ നായ്ക്കളെ പ്രാപ്തരാക്കുന്നത് ചെറുപ്പത്തിൽത്തന്നെ ലഭിക്കുന്ന പരിശീലനമാണ്. നായ്ക്കൾക്കു പരിശീലനം നൽകുന്ന ഒട്ടേറെ സ്ഥാപനങ്ങളുണ്ട് ഇന്നു നമ്മുടെ നാട്ടിൽ. എന്നാൽ ഇവിടെയൊക്കെയുള്ള പരിശീലകരിൽ മിക്കവരുടെയും ഗുരു ഒരാൾ തന്നെ. കെ.പി. സഞ്ജയൻ എന്ന സൂപ്പർ ട്രെയിനർ. ശ്വാനപരിശീലനത്തിൽ 32 വർഷത്തെ പ്രവൃത്തിപരിചയമുള്ള അദ്ദേഹം 2008 ലാണ് പരിശീലകരെ പഠിപ്പിക്കാനിറങ്ങിയത്.

പട്ടാളച്ചിട്ടയിൽ പരിശീലനം

സഞ്ജയൻ ബിഎസ്എഫിൽ പ്രവേശിച്ച കാലത്ത് അണ്ടർ ട്രെയിനികളായവർക്ക് നാഷനൽ ട്രെയിനിങ് സെന്റർ ഫോർ ഡോഗ്സ് ബിഎസ്എഫ് തെക്കൻപുരിൽ ജോലി ചെയ്യാൻ അവസരം ലഭിച്ചിരുന്നു. അങ്ങനെ നായ്ക്കളോട് താൽപര്യം തോന്നി. പരിശീലനം പൂർത്തിയാക്കി പഞ്ചാബ് അതിർത്തിയിൽ നിയോഗിക്കപ്പെട്ടു. തുടർന്ന് 1990ൽ ശ്വാന പരിശീലന കോഴ്സ് ചെയ്യാൻ അവസരം ലഭിച്ചതാണ്  ജീവിതത്തിലെ വഴിത്തിരിവ്. നാഷനൽ ട്രെയിനിങ് സെന്റർ ഫോർ ഡോഗ്സ് ബിഎസ്എഫ് തെക്കൻ പുരിൽ തിരിച്ചുവന്ന് ഡോഗ് ട്രെയിനിങ് പഠിച്ചു. നല്ല ഗ്രേഡിൽ പാസായി. പിന്നാലെ അവിടെത്തന്നെ ഇൻസ്ട്രക്ടർ ആയി. അങ്ങനെ 1990 മുതൽ ശ്വാന പരിശീലനമേഖലയിൽ സജീവമായെന്നു സഞ്ജയൻ.