സേതുവിന്റെ വീടുറങ്ങി ഇനി പൊന്നമ്മയുമില്ല

വാത്സല്യത്തിന്റെ മറു പേരായ കവിയൂർ പൊന്നമ്മയുടെ അമ്മ വേഷം ശരിക്കും മോഹൻലാലിന്റെ അമ്മ തന്നെയാണോ എന്ന് തോന്നിക്കുന്ന അഭിനയമായിരുന്നു. സിനിമയിൽ അഭിനയിക്കുന്നതിനിടയിൽ താൻ ഏറെ വിഷമിച്ച് പോയ സന്ദർഭത്തെക്കുറിച്ച് കവിയൂർ പൊന്നമ്മ ഒരു അഭിമുഖത്തിൽ പറഞ്ഞിരുന്നു. 'തിലകൻ ചേട്ടനുമായി മോഹൻലാൽ വഴക്കിട്ട് ഇറങ്ങിപ്പോകുന്ന രംഗമുണ്ട്. എനിക്കിവിടെ വേറെയും മക്കളുണ്ടെന്ന് പറഞ്ഞ് ഞാൻ മോഹൻലാലിനെ ഇറക്കിവിടുകയാണ്. തിരിഞ്ഞു നോക്കിയാണ് കുട്ടൻ നടക്കുന്നത്. താൻ ഓടിച്ചെന്ന് വിളിക്കുമ്പോൾ പറയുന്ന ഒരു ഡയലോഗുണ്ട്. എനിക്ക് എന്റെ ജീവിതം കൈവിട്ടുപോകുന്നു അമ്മേയെന്ന്. അത് ചിത്രീകരിക്കുന്ന സമയത്ത് ഹൃദയം നുറുങ്ങുന്ന വേദനയായിരുന്നു', കവിയൂർ പൊന്നമ്മ ഒരിക്കൽ പറഞ്ഞു. മലയാള സിനിമയിലെ അമ്മയും മകനുമെന്നാൽ അത് മോഹൻലാലും കവിയൂർ പൊന്നമ്മയുമാണ്. മകൻ സ്വപ്നം കണ്ട ജീവിതം കൈവിട്ടു പോകുന്നത് നിസഹായതയോടെ കാണേണ്ടിവരുന്ന നിർഭാഗ്യവതിയായ ഒരു അമ്മ.

- അനഘ രാജീവ്

മലയാളിയുടെയും മലയാള സിനിമയുടെയും എക്കാലത്തെയും തീരാ നഷ്ടങ്ങളിലൊന്നാണ് പ്രേക്ഷക മനസിൽ പെരുന്തച്ചനായി അടിതിമിർത്ത തിലകനും മലയാളികളുടെ മാതൃഭാവം കവിയൂർ പൊന്നമ്മയും. അച്ഛൻ-അമ്മ വേഷങ്ങളെക്കുറിച്ച് സംസാരിക്കുമ്പോൾ മലയാളികളുടെ മനസിലേക്ക് ആദ്യം കടന്നു വരുന്ന രണ്ട് മുഖങ്ങളാണ് തിലകന്റേയും കവിയൂർ പൊന്നമ്മയുടേയും. പലപ്പോഴും മോഹൻലാലിന്റെ ഓൺ സ്ക്രീൻ അച്ഛനും അമ്മയുമായാണ് ഇരുവരും എത്താറുള്ളത് എന്നത് കൗതുകകരമായ വസ്തുതയാണ്.

മലയാളികൾക്ക് ഒരിക്കലും മറക്കാനാകാത്ത നിരവധി സിനിമാ മുഹൂർത്തങ്ങൾ സമ്മാനിച്ചിട്ടുണ്ട് ഇരുവരും . 1973 ൽ പെരിയാർ എന്ന ചിത്രത്തിൽ തിലകന്റെയും അമ്മയായും കവിയൂർ പൊന്നമ്മ അഭിനയിച്ചിട്ടുണ്ട്. എന്നാൽ തിലകൻ പിൽക്കാലത്ത് കവിയൂർ പൊന്നമ്മയുടെ ഭർത്താവിന്റെ വേഷങ്ങളിൽ പ്രക്ഷേക്പ്രീതി പിടിച്ചുപറ്റുകയായിരുന്നു.

പല അവസരങ്ങളിലും തിലകനുമൊത്തുള്ള ഓർമ്മകൾ കവിയൂർ പൊന്നമ്മ പങ്കുവച്ചിരുന്നു. ഒപ്പം തിലകനുമായി പിണങ്ങിയ സംഭവത്തെക്കുറിച്ചും അവർ സംസാരിച്ചിരുന്നു. കിരീടം ഉൾപ്പടെയുള്ള സിനിമകളിൽ തനിക്ക് എന്തെങ്കിലും ചെയ്യാൻ സാധിച്ചിട്ടുണ്ടെങ്കിൽ അത് കവിയൂർ പൊന്നമ്മയുടെ പിന്തുണ മൂലമാണെന്നാണ് ഒരിക്കൽ തിലകൻ പറഞ്ഞിരുന്നു. സിനിമയിലെത്തുന്നതിനും ഒരുപാട് മുമ്പേയുള്ള ബന്ധമാണ് ഇരുവരും തമ്മിൽ. നാടകകാലത്ത് തുടങ്ങിയ ബന്ധം. പിന്നീട് സിനിമയിലും അവർ ഒരുമിച്ചു. വർഷങ്ങളുടെ സൗഹൃദം നൽകുന്ന കംഫർട്ടായിരുന്നു അവരുടെ രംഗങ്ങളെ മനോഹരമാക്കിയത്.