ഉലക വാലിബൻ

പ്രഖ്യാപനം മുതൽ ലോകമെമ്പാടുമുള്ള മോഹൻലാൽ ആരാധകർ ഏറെ കാത്തിരുന്ന ഒരു സിനിമയാണ് മലൈക്കോട്ടെ വാലിബൻ. മലയാളത്തിന്റെ മോഹൻ ലാൽ അവതരിക്കുന്നുവെന്ന സബ്ടൈറ്റിലോടെയായിരുന്നു സിനിമയുടെ പ്രഖ്യാപനം. ഒരു പോരാളിയായാണ് മോഹൻലാൽ ഈ ചിത്രത്തിൽ എത്തുന്നത്. ലിജോ ജോസ് പെല്ലിശ്ശേരിയുമായുള്ള മോഹൻലാലിന്റെ ആദ്യ സിനിമയാണിത്. ഒരുവർഷത്തോളമെടുത്ത് ഷൂട്ടിംഗ് പൂർത്തിയാക്കിയ ചിത്രം ഇപ്പോൾ തിയേറ്ററുകളിൽ നിറഞ്ഞ സദസിൽ പ്രദർശനം തുടരുകയാണ്. തന്റെ പുതിയ സിനിമാ വിശേഷങ്ങൾ മോഹൻലാൽ വെള്ളിനക്ഷത്രത്തോട് പങ്കുവയ്ക്കുന്നു...

- മോഹൻലാൽ/ ബി. വി. അരുൺ കുമാർ

ഒരു വർഷത്തെ കാത്തിരിപ്പിനു ശേഷം മലക്കോട്ടെ വാലിബൻ അവതരിച്ചിരിക്കുകയാണ്. എന്ത് തോന്നുന്നു?

വളരെയേറെ ആകാംഷയോടെയും പ്രതീക്ഷയോടെ യുമാണ് മലൈക്കോട്ടെ വാലിബൻ തിയേറ്ററുകളിൽ എത്തിയത്. ഷൂട്ടിംഗ് തന്നെ വളരെ രസകരമായ ഒന്നായിരുന്നു. ആരും പറയാത്ത, ആരും കാണാത്ത ഫ്രെയിമുകളാണ് ഈ സിനിമയിൽ ചെയ്തിരിക്കുന്നത്. എല്ലാവരുടെയും പ്രതീക്ഷയ്ക്കനുസരിച്ച് ഈ ചിത്രം എത്തി എന്നതിൽ വളരെ സന്തോഷമുണ്ട്.

കേരളത്തിന് പുറത്തായിരുന്നല്ലോ ഷൂട്ടിംഗ്?

രാജസ്ഥാൻ, ചെന്നൈ, പോണ്ടിച്ചേരി തുടങ്ങിയ സ്ഥലങ്ങളിലായിരുന്നു ഷൂട്ടിങ്ങ്. ഒരുപക്ഷേ ഇവിടെ മാത്രം ഷൂട്ട് ചെയ്തിരുന്നുവെങ്കിൽ ഇത്രയും വലിയ ക്യാൻവാസിൽ ഈ സിനിമ വരുമായിരുന്നില്ല. ഷൂട്ടിംഗ് നടന്ന സമയത്ത് നല്ല തണുപ്പായിരുന്നു. പല ആർട്ടിസ്റ്റുകൾക്കും അസുഖമായി. രാത്രികാലങ്ങളിലെ ഷൂട്ടിംഗ് വളരെ പാടായിരുന്നു. അതുകഴിഞ്ഞ് കനത്തചൂടുള്ള സെറ്റിലേക്ക് ഷൂട്ടിംഗ് വന്നു. ഇതൊക്കെ അതിജീവിച്ചാണ് ഈ സിനിമ തിയേറ്ററുകളിൽ എത്തിച്ചിരിക്കുന്നത്.

എങ്ങനെയാണ് ഈ സിനിമയിലേക്കെത്തിയത്?

ലിജോ ജോസിനെ എനിക്ക് നേരത്തെ അറിയാം. സിനിമകളെ കുറിച്ച് ഞങ്ങൾ ഡിസ്കസ് ചെയ്തിട്ടുണ്ട്. ഈ കഥ പറയുന്ന സമയത്ത് ഞാനും നിർമാതാവ് ഷിബു ബേബിജോണും ചേർന്ന് ഒരു സിനിമ ചെയ്യാനിരിക്കുകയായിരുന്നു. എന്നാൽ ചില ടെക്നിക്കൽ പ്രശ്നങ്ങൾ കാരണം ആ സിനിമ അപ്പോൾ ചെയ്യാൻ സാധിച്ചില്ല. അങ്ങനെയെങ്കിൽ വേറെ കഥ നോക്കാമെന്ന് ഷിബു പറഞ്ഞു. ലിജോയും ഷിബു ബേബിജോണും തമ്മിൽ പരിചയമുണ്ടായിരുന്നു. ഷിബു സിനിമ ചെയ്യാനുള്ള തയാറെടുപ്പ് ലിജോ അറിഞ്ഞിരുന്നു. അവർ തമ്മിൽ ചർച്ചകൾ നടത്തി. ആ തോട്ട് ഷിബു എന്നോടു ഷെയർ ചെയ്തു. അവർ എന്റെ അടുത്തുവന്നു കഥപറഞ്ഞു. കഥ കേട്ടപ്പോൾ തന്നെ ഒരു വ്യത്യസ്തമായ സിനിമയാണ് ഇതെന്ന് എനിക്ക് ബോധ്യമായി. അങ്ങനെ വലിയൊരു സിനിമയായി വാലിബൻ മാറി.

കഥ കേട്ടപ്പോൾ ഇതൊരു ചരിത്ര സിനിമയായി തോന്നിയോ?