സ്കോഡയുടെ സ്ഫടികം

5 സ്റ്റാർ സുരക്ഷിതത്വവും മികച്ച പെർഫോമൻസും മാക്കുമായി സ്കോഡയുടെ സബ്ഫോർമീറ്റർ എസ്യുവി

- നോബിൾ എം. മാത്യു

സ്ഫടികം! കൈലാഖ് എന്ന പേരിന്റെ അർഥമിതാണ്. സംസ്കൃതത്തിൽ നിന്നാണ് പേരിന്റെ ഉറവ്. തിളങ്ങുന്നത്, മോഹിപ്പിക്കുന്നത്, വിലയുള്ളത് എന്നിങ്ങനെ പലതരത്തിൽ പല തലത്തിൽ സ്ഫടികത്തിനു വിശേഷണം നൽകാം. സ്കോഡയുടെ പുതിയ കൈലാഖും അത്തരം വിശേഷണത്തിന് അർഹനാണ്. വിശദമായി ഒന്നു കാണാം..

ബോൾഡ് ലുക്ക്

കോഡിയാക്കിന്റെയും കുഷാക്കിന്റെയും തലയെടുപ്പും ഗരിമയും കൈലാഖിനുമുണ്ട്. കോംപാക്റ്റ് എസ് യു വികളിൽ റോഡ് പ്രസൻസ് കൂടുതലുള്ള വാഹനമെന്നു വേണമെങ്കിൽ വിശേഷിപ്പിക്കാം. നാലു മീറ്ററിൽ താഴെയാണ് നീളം. അതുകൊണ്ട് കുഷാക്കിനെക്കാളും നീളം കുറവാണ്. എന്നാൽ വീതി കുഷാക്കിനെക്കാളും കൂടുതലുണ്ട് കൈലാഖിന്. മാത്രമല്ല ഉയരക്കൂടുതലും കൈലാഖിനു തന്നെ. അപ്പോൾ മുൻപു പറഞ്ഞ റോഡ് പ്രസൻസ് കൈലാഖിനു തന്നെയല്ലേ? ഒലിവ് ഗോൾഡ് എന്ന പച്ചക്കളർ കാഴ്ചയിൽ ആരുടെയും ശ്രദ്ധകവരും. ഒപ്പം ത്രിഡി റിബ്സോടുകൂടിയ ബ്ലാക്ക് ഗ്രില്ലും നേർത്ത എൽഇഡി ഡേ ടൈം റണ്ണിങ് ലാംപും ചേരുമ്പോൾ മുന്നിൽ നിന്നുള്ള കാഴ്ചയിൽ കൈലാഖ് വേറിട്ടതാകുന്നു. സ്കോഡ ക്രിസ്റ്റലൈൻ എൽഇഡി പ്രൊജക്ടർ ഹെഡ്ലാംപാണ്. മസ്കുലർ ബോണറ്റും ബ്ലാക് കളർ ബംപറും അതിലെ സിൽവർ ഫിനിഷ് ലിപ്പും ക്ലാസാണ്. ചതുര വടിവാർന്ന ബ്ലാക്ക് ക്ലാഡിങ്ങോടു കൂടിയ വീൽ ആർച്. 17 ഇഞ്ച് അലോയ് വീലിനു പോലും ബോൾഡ് ഡിസൈനാണ്. ഫ്യുച്ചറിക് ഡിസൈനല്ല, മറിച്ച് ഒഴുക്കുള്ള എന്നാൽ മസിൽ തുടിപ്പുള്ള എക്സ്റ്റീരിയർ ഡിസൈൻ. എൽഇ ഡിയാണ് ടെയിൽലാംപ്, കനമുള്ള ബംപറും അതിലെ സ്കിഡ് പ്ലേറ്റും എസ്യുവി ചന്തം പിൻഭാഗത്തിനു നൽകുന്നു. മൊത്തത്തിൽ കാഴ്ചയിൽ ഗംഭീരമെന്നു പറയാം.

വേരിയന്റുകൾ

ക്ലാസിക്, സിഗ്നേച്ചർ, സിഗ്നേച്ചർ പ്ലസ്, പ്രസ്റ്റീജ് എന്നിങ്ങനെ നാലു വേരിയന്റുകളുണ്ട്. ബേസ് മോഡലിൽ 16 ഇഞ്ച് സ്റ്റീൽ വീലാണ്. പക്ഷേ, അലോയ് എന്നു തോന്നിപ്പിക്കുന്ന തരത്തിലുള്ള വീൽക്കപ്പുണ്ട്. മിഡിൽ വേരിയന്റുകളിൽ അലോയ് വീലാണ്. ടെസ്റ്റ് ഡ്രൈവ് ചെയ്തത് ടോപ് എൻഡ് മോഡലായ പ്രസ്റ്റീജാണ്. ഓട്ടമാറ്റിക് ഹെഡ്ലാംപ് ഫീച്ചർ ഉയർന്ന രണ്ടു മോഡലിലേയുള്ളൂ. കോർണറിങ് ഫങ്ഷനോടു കൂടിയ എൽഇഡി ഫോഗ് ലാംപ് ഉയർന്ന വേരിയന്റിലുണ്ട്. ഏഴു നിറങ്ങളുണ്ട് കൈലാഖിന്.

സ്പോർട്ടി & ക്ലാസ്