MLA Ramesh USHARODY

പാലക്കാട് മണ്ഡലത്തിലൂടെ ഉഷാറായി പായുന്ന രമേഷ് പിഷാരടിക്കൊപ്പം ഒരു ദിനം

- വിജീഷ് ഗോപിനാഥ്

രാവിലെ ഏഴു മണി. മുൻപായിരുന്നെങ്കിൽ ഒരു സ്റ്റേജ് ഷോ കഴിഞ്ഞു രമേഷ് പിഷാരടി പലപ്പോഴും ഉറങ്ങാൻ കിടക്കുന്ന സമയം. അല്ലെങ്കിൽ ഷൂട്ട് വൈകിയ ദിവസങ്ങളിൽ സുഖനിദ്രയിലാവുന്ന സമയം. ഇന്നിപ്പോൾ പാലക്കാട് പുത്തൂരിലെ വീടിന്റെ മുന്നിൽ എംഎൽഎ ബോർഡ് വച്ച കാറിലേക്കു ധൃതിയിൽ പിഷാരടി കയറുന്നു.

ഇന്നത്തെ പരിപാടികളെക്കുറിച്ചുമുള്ള ചർച്ച ആദ്യം... നെല്ലുസംഭരണത്തിലെ വേവലാതികൾ കർഷകർ അറിയി ച്ചിട്ടുണ്ട്. അവിടെ പോവണം. കോൺട്രാക്ടേഴ്സ് അസോ സിയേഷൻ ജില്ലാ സമ്മേളനം, മലയാള മനോരമയിൽ ഹ ലോ എംഎൽഎ എന്ന ഫോൺ ഇൻ പ്രോഗ്രാം, എൻജിഒ അസോസിയേഷൻ പരിപാടി... കാർ പാലക്കാട്ടെ വയലുകൾക്കു നടുവിലൂടെ മുന്നോട്ടു പോവുമ്പോൾ പിഷാരടിയുടെ ഓർമയിലൊരു കരിമ്പനക്കാറ്റു വീശി

“ഇവിടുത്തെ ഒരുപാടു വയലുകളിൽ മിമിക്രിയും സ്റ്റേജ് ഷോകളും അവതരിപ്പിച്ചിട്ടുണ്ട്. പാലക്കാട് പരിപാടിയുമായി വരാൻ പേടിയായിരുന്നു. കൊയ്ത്തു കഴിഞ്ഞ പാടത്തായിരിക്കും സ്റ്റേജ്. റോഡിൽ നിന്നു ദൂരേക്കു നോക്കിയാൽ സ്റ്റേജ് കാണാം. അവിടെ വരെ സൗണ്ട് സിസ്റ്റം ചുമക്കണം. പിന്നെയുള്ളതു വീശിയടിക്കുന്ന കാറ്റാണ്. എത്ര ഉറക്കെ പറഞ്ഞിട്ടും കാര്യമില്ല, കോമഡി പാതിയും കാറ്റു കൊണ്ടു പോവും.''

ഇതുപോലെ ഒരു നിയോഗം വരുമെന്ന് എപ്പോഴെങ്കിലും കരുതിയോ? ഈ മാറ്റത്തെ കുടുംബം കണ്ടതെങ്ങനെ?

ഞാൻ ചിന്തിച്ചിട്ടില്ല. അച്ഛന് വെള്ളൂർ പേപ്പർ കമ്പനിയിലായിരുന്നു ജോലി, ഐഎൻടിയുസി പ്രവർത്തകനായിരുന്നു. അതിനപ്പുറം രാഷ്ട്രീയപാരമ്പര്യം എനിക്കില്ല. തിരഞ്ഞെടുപ്പിന് ഇറങ്ങുമ്പോൾ ജീവിതത്തിൽ ഉണ്ടാവാൻ പോവുന്ന മാറ്റത്തെക്കുറിച്ചു ഭാര്യയോടു പറഞ്ഞിരുന്നു. കുടുംബത്തിനു വേണ്ടി മാറ്റിവയ്ക്കുന്ന സമയം ഇനി മുതൽ വളരെ കുറയും. വീട്ടിലെ ഉത്തരവാദിത്തം ഏറ്റെടുക്കേണ്ടിയും വരും. അവൾ സപ്പോർട്ടു ചെയ്തു.

കല്യാണം കഴിഞ്ഞിട്ട് ഇതു വരെ ലൊക്കേഷനുകളിൽ വരാൻ ഭാര്യ താൽപര്യം കാണിച്ചിട്ടില്ല. പക്ഷേ, ഇലക്ഷനിൽ അവൾക്കും ആവേശമായി. രണ്ടാഴ്ചയോളം വീടുകൾ തോറും കയറി ഇറങ്ങി വോട്ട് അഭ്യർഥിച്ചു.

മക്കൾക്കു പാലക്കാട്ടെ രാഷ്ട്രീയച്ചൂടും വിജയത്തിന്റെ വലുപ്പവും അറിയില്ല. വിജയിച്ചു കഴിഞ്ഞപ്പോൾ മോൻ ആദ്യം ചോദിച്ചത് പ്രചാരണ സമയത്തു ഞാൻ കയറിയ തുറന്ന ജീപ്പിനെക്കുറിച്ചാണ്. അതെവിടുന്നു കിട്ടി? ഏതു മോഡലാണു വണ്ടി...