'മണ്ണ് വേണ്ടാ' ചെടികൾ

ചട്ടിയോ മണ്ണോ ആവശ്യമില്ലാത്ത എയർ പ്ലാന്റ്സ് വളർത്തുന്ന വിധം

- ജേക്കബ് വർഗീസ് കുന്തറ റിട്ട. പ്രഫസർ, ബോട്ടണി വിഭാഗം, ഭാരത് മാത കോളജ് എറണാകുളം

കൈ തയുടെ കുടുംബത്തിലെ അലങ്കാര ചെടികളാണ് എയർ പ്ലാന്റ്സ്, വളർത്താൻ ചട്ടിയോ മണ്ണോ വേണ്ട എന്നതാണ് ഇവയുടെ പ്രത്യേകത. വള്ളിയിൽ തൂക്കിയിട്ടും, ഡിഫ്ട് വൂഡിൽ ഒട്ടിച്ചും മരത്തിൽ കെട്ടിവച്ചും ടെറേറിയത്തിലുമെല്ലാം ഇവ അനായാസം പരിപാലിക്കാൻ സാധിക്കും. ടില്ലാൻസ്യ വർഗത്തിൽപ്പെടുന്ന ഇവയുടെ ഇലകളിൽ നിറയെ വെള്ള പൊടി പോലെ ആവരണമുള്ള അയോനാൻ, സ്പാനിഷ് മോസ് തുടങ്ങിയവയും പച്ച നിറത്തിൽ മിനുസമുള്ള ഇലകളുമായി പിങ്ക് ക്വിൽ ഇനങ്ങളുമാണു നമ്മുടെ നാട്ടിൽ പരിപാലിക്കുന്നതിൽ അധികവും.

നല്ല വായു സഞ്ചാരവും പാതി തണലും കിട്ടുന്ന ഇടമാണ് ഇവ വളർത്താൻ പറ്റിയത്. സ്പാനിഷ് മോസ് ഇനം കെട്ടി തൂക്കിയിട്ടു അനായാസം വളർത്താം. ഇതിന്റെ നരച്ച താടി പോലുള്ള നേർത്തു നീണ്ട ഇലകളിൽ തുള്ളി നന നൽകിയാൽ മതി. ഇലകൾക്കിടയിൽ ഈർപ്പം അധികമായാൽ കുമിളും പച്ചപ്പായലും വളർന്നു കയറി ചെടിയെ നശിപ്പിച്ചുകളയും.