ആത്മവിശ്വാസം കൂട്ടും ഇന്റിമേറ്റ് രൂപഭംഗി

ലൈംഗികതയുമായി ചേർന്നു നിൽക്കുന്ന ആരോഗ്യ- സൗന്ദര്യ പ്രശ്നങ്ങൾ പരിഹരിക്കാനുള്ള കോസ്മറ്റിക് ഗൈനക്കോളജി ചികിത്സകൾ

- 

കുഞ്ഞുവാവ വയറ്റിൽ വളർന്നു തുടങ്ങി. അഞ്ചാം മാസം ആയപ്പോൾ മുതൽ ഗോപിക പ്രസവശേഷമുള്ള സൗന്ദര്യസംരക്ഷണത്തിനുള്ള കരുതൽ തുടങ്ങി. അമ്മ പ്രത്യേകം തയാറാക്കിയ വെന്ത വെളിച്ചെണ്ണ വയറിൽ തടവിയതിനു ശേഷമാണു കുളി. എട്ടാം മാസമെത്തും വരെ വയറിനു നല്ല കണ്ണാടിത്തിളക്കം. പക്ഷേ, അവസാന ആഴ്ചകളിലേക്ക് എത്തിയപ്പോൾ വയറിനു കുറുകെ സ്‌ട്രെച് മാർക്കുകൾ പ്രത്യക്ഷപ്പെട്ടു തുടങ്ങി. പൊടിക്കൈകൾ ഫലിക്കില്ലെന്നും ഗർഭകാലത്തിൽ ഇതു സ്വാഭാവികമാണെന്നും ഗോപികയ്ക്കു ബോധ്യം വന്നു.

പ്രസവശേഷം വീട്ടിലെത്തി. പ്രസവാനന്തര പരിചരണത്തിനും സൗന്ദര്യസംരക്ഷണത്തിനുമുള്ള മാർഗങ്ങളെക്കുറിച്ചു ഗോപിക അന്വേഷിച്ചു. അങ്ങനെയാണു കോസ്മറ്റി ക് ഗൈനക്കോളജിയെക്കുറിച്ച് അറിയുന്നത്. 18 വയസ്സ് കഴിഞ്ഞവർക്കേ കോസ്മറ്റിക് ഗൈനക്കോളജി ട്രീറ്റ്മെന്റ് സ്വീകരിക്കാൻ കഴിയൂ. സ്റ്റിച്ചിന്റെ പാടുകൾ വീണ ഭാഗം പഴയതു പോലെ ഭംഗിയാക്കാം. ലൂസായ വജൈനയുടെ ഇറുക്കം പാകപ്പെടുത്താം. യൂറിൻ ലീക്ക് പോലുള്ള പ്രശ്നങ്ങൾ പരിഹരിക്കാം. അങ്ങനെ പല വിവരങ്ങളും ഗോപിക മനസ്സിലാക്കി. അപ്പോൾ മറ്റൊരു സംശയം തോന്നി.

പ്രസവം കഴിഞ്ഞ സ്ത്രീകൾക്കു മാത്രമാണോ കോസ്മറ്റിക് ഗൈനക്കോളജി കൊണ്ടുള്ള പ്രയോജനം? ഗോപിക സുഹൃത്തായ ഡോക്ടറെ വിളിച്ചു ചോദിച്ചു.

പ്രസവശേഷവും പഴയതു പോലെ

“പ്രസവാനന്തരമുള്ള പ്രശ്നങ്ങൾക്കു മാത്രമല്ല, പ്രായം കൂടുമ്പോഴുണ്ടാകുന്ന മാറ്റങ്ങൾക്കും കോസ്മറ്റിക് ചികിത്സകൾ പരിഹാരമാണ്. രൂപഭംഗി, പ്രവർത്തനക്ഷമത, പുനർ നവീകരണം എന്നിങ്ങനെ മൂന്നു വിഭാഗങ്ങളിൽപ്പെട്ട ചികിത്സകളാണ് കോസ്മറ്റിക് ഗൈനക്കോളജിയിലുള്ളത്. പേരിൽ കോസ്മറ്റിക് എന്നുള്ളതുകൊണ്ടു സ്വകാര്യഭാഗങ്ങളുടെ സൗന്ദര്യം കൂട്ടാനുള്ള ചികിത്സ മാത്രമാണിതെന്നാണു പലരുടേയും ധാരണ.'' ഡോക്ടർ ഗോപികയോടു വിശദമായി സംസാരിച്ചു.

“യഥാർഥത്തിൽ സൗന്ദര്യം മാത്രമല്ല, ഘടനാപരമായ വൈകല്യങ്ങൾ പരിഹരിക്കാനും പ്രവർത്തനക്ഷമതയും ലൈംഗിക സംതൃപ്തിയും വർധിപ്പിക്കാനും മാർഗങ്ങളുണ്ട്. സ്വകാര്യഭാഗങ്ങളുടെ രൂപഭംഗി കൂട്ടാൻ സർജിക്കൽ പരിഹാരങ്ങൾ തേടുന്നവരുടെ എണ്ണം നമ്മുടെ നാട്ടിൽ കുറവാണ്. എന്നാൽ, സ്വകാര്യഭാഗത്തെ ഇരുണ്ട നിറം മാറ്റാനായുള്ള ട്രീറ്റ്മെന്റുകൾ സ്വീകരിക്കുന്നവർ ഏറെയാണ്.