ചലിയേ റാണീസ്

"ചലിയേ റാണി ബേബി..ബേബി', "ഏത് മൂഡ്... ഓണം മൂഡ് അങ്ങനെ പുതുതലമുറ ഗാനങ്ങളിലൂടെ പാട്ടിന്റെ ന്യൂവബായ ഹിലാരി സിസ്റ്റേഴ്സിന്റെ സംഗീതയാത്രയുടെ കഥ

- ഡെൽന

എറണാകുളം ചേരാനല്ലൂരിലുള്ള വീടിന്റെ താഴത്തെ നിലയിൽ ബീന ഹിലാരി പഴംപൊരിയുണ്ടാക്കുന്ന തിരക്കിലാണ്. ഇളയ മകൾ ഹിനിത അമ്മയ്ക്കൊപ്പം തന്നെയുണ്ട്. പഴംപൊരിക്കു മേൽ ഗോൾഡൻ ബ്രൗൺ കണ്ടു തുടങ്ങിയതും ഹിനിത 'മൂഞ്ചിഫിക്കേഷൻ' ഗ്രൂപ്പിലേക്ക് അപ്ഡേറ്റ് അയച്ചു.

"പഴംപൊരി റെഡി. വേണെങ്കിൽ വാ. ഇല്ലേൽ ഞാൻ തിന്നു തീർക്കും.' അനുജത്തിയുടെ ഫൂഡ് അപ്ഡേറ്റ് വന്നതും ചേച്ചിമാരായ ഹിംനയും ഹിൻഷയും മുകളിലത്തെ നിലയുടെ രണ്ടുദിക്കിൽ നിന്നു പാഞ്ഞെത്തി.

മൂന്നുപേരാണെങ്കിലും സ്പിരിറ്റ് ഒന്നാണ് ഇവർക്ക്, പാട്ടിലും ജീവിതത്തിലും. ഹിംന ഹിലാരിയാണു സഹോദരിമാരിൽ മുതിർന്നവൾ. പിന്നെ, ഹിൻഷയും ഹിനിതയും.

പള്ളിയിൽ തുടങ്ങിയ പാട്ട്

കോരാമ്പാടം സെന്റ് മേരീസ് പള്ളിയിലെ ക്വയറിൽ നിന്നു തുടങ്ങിയ പാട്ടിന്റെ കൂട്ട് ചലിയേ റാണി എന്ന മ്യൂസിക് ആൽബത്തിലൂടെ ഇന്റിപെൻഡന്റ് മ്യൂസിക്കിലേക്കും പിന്നണിഗാനരംഗത്തേക്കും എത്തി. സാഹസത്തിലെ ഓണം മൂഡ് പാട്ടു വരെയെത്തി നിൽക്കുകയാണ് സഹോദരിമാരുടെ പ്ലേബാക്ക് യാത്ര. ഫോട്ടോഷൂട്ടിനായി വനിതയുടെ കൊച്ചി സ്റ്റുഡിയോയിലേക്ക് ഹിലാരി സഹോദരിമാർ എത്തിയത് സെലിബ്രിറ്റി വൈബോടെയാണ്.

ചിരിയുടെ താളത്തിലാണു നടത്തം പോലും. മേക്കപ് സഹായിയും കൂട്ടുകാരിയും ഒപ്പമെത്തി. പുഞ്ചിരിയോടെ ഹിംന പറഞ്ഞു തുടങ്ങി. “ഇവരൊക്കെ പഴ്സനൽ ക്രൂ ആണ്. ഇങ്ങനെ കിട്ടുന്ന സ്നേഹവും പിന്തുണയുമാണ് ഞങ്ങളെ മുന്നോട്ടു നടത്തുന്നത്. അച്ഛനുമമ്മയും ഒപ്പമുണ്ടെങ്കിൽ ഇപ്പോഴും ഭക്ഷണം വാരിത്തരും. അത്രയ്ക്കു സ്നേഹമാണ്. പാട്ടുകളിലൂടെയും കുറേയേറെ സ്നേഹം കിട്ടുന്നുണ്ട്. അച്ഛൻ ഹിലാരിയോസ് കൺസ്ട്രക്ഷൻ മേഖലയിലാണു പ്രവർത്തിച്ചിരുന്നത്. നന്നായി പാടും. പള്ളിയിൽ പാടിയിരുന്നു. ചെറിയ പ്രോഗ്രാമുകളും ചെയ്തിരുന്നു. അച്ഛൻ മാത്രമല്ല അമ്മയും പാടും. അഞ്ചു പാട്ടുകാരാണു വീട്ടിൽ.